Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 387 Hüküm no: 496 Orijinal metin no: [81a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Niko’nun bağını İstamoli’ye sattığı Vilâyet-i Rumeli’nde Delvine sancağında Mazaraki kazâsında Plaşviçe nâm karye sâkinlerinden Yani v. Niko nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde vâki‘ bir tarafdan Dimo v. Kosta bağı ve bir tarafdan Naho v. Toma bağı ve bir tarafdan Niko v. Lika bağı ve bir tarafdan tarîk-i âm ile mahdûd sekiz çapalık bir kıt‘a mülk bağımı mezbûr İstamoli’ye fıddî nakd-i râyic fi’l-vakt dört bin yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr dört bin yüz akçeyi mezbûr İstamoli’yi taslît eyledim ba‘de’l-yevm zikr olunan bağ-ı mezbûr İstamoli’nin mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Veli, Ali b. Mustafa, Yani [v.] Mihal, Yorgi [v.] Çiro, Yani [v.] Dimo, Dimo [v.] Halke, Mihal [v.] İstamoli, Todori [v.] Yani, Yorgi [v.] Liko, Niko [v.] Todori, Yani [v.] Yo[r]gaki.