Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 386 Hüküm no: 495 Orijinal metin no: [81a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Palaloga v. Hristo’nun evini istiğlâl yoluyla Cafer Paşa Vakfı’na sattığı Mahmiye-i Kostantıniyye mahallâtından Mustafa Paşa mahallesinde sâkin olan Palaloga v. Hristo nâm zimmî meclis-i şer‘-i şerîfde hâzır olup âtiyyü’z-zikr menzilini merhûm Cafer Paşa vakfı’na mütevellî olan hâmil-i hâze’l-kitâb Mehmed b. Hamza’ya bey‘ ettiğini ikrâr ve i‘tirâf etti. Mütevellî-i mezbûr da vakf-ı merkūm malıyla ve istiğlâl maksadıyla, bâyi‘-i mezbûrun işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i mezbûrede kâin olan, bir tarafdan Yorgi mülkü üç tarafdan tarîk-i âm ile mahdûd olan cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt iki yüz kırk ak çeyrek ve altı bin akçe semen-i mu‘ayyen-i makbûzla iştirâ etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına ( ) bin dört yüz akçe ücret ile menzili kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Sonra mukırr-ı mezbûrun iki oğlu Mustafa Beşe ve Manol nâm kimesneler menzil-i mezbûrun derkine, ücret-i merkūmeye ve asl-ı meblağ-ı merkūma îcâb ve kabûlü hâvî kefâletle kefîl oldular. Cerâ zâlike ve hurrire fî gurreti Zilka‘deti’ş-şerîfe sene seb‘a ve erba‘în ve elf. Şuhûdü’l-hâl: Receb Efendi b. Abdi, Ali Çelebi b. İskender, Mustafa b. ( ), Yusuf b. Abdullah, Abdurrahman b. Ömer, kâtib Cafer Çelebi, Abdullah Halîfe b. İbrahim, Ömer b. Ramazan ve gayruhüm