Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 389 Hüküm no: 500 Orijinal metin no: [81b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Nasrullah Efendi b. Ömer Efendi’nin vakıf arsaya inşa ettirdiği evin keşfi Medîne-i Hazret-i Ebî Eyyûb el-Ensârî -radiye anhü Rabbühü’l-Bârî-mahallâtından Câmi‘-i Kebîr mahallesinde vâki‘ bir tarafı merhûm Hüseyin Bâli ve Taşçı vakıfları ile ba‘zan Mehmed Çelebi ve etrâf-ı selâsesi tarîk-i âm ile mahdûd iki bâb tahtânî ve bir mikdâr arsa-i hâliyemi müştemil merhûm Bakırî Muslihiddin Efendi vakf ve süknâsı ulemâdan birine şart eylediği menzile ber mûceb-i şart-ı vâkıf mutasarrıf olan ulemâdan kutbü’l-ârîfîn ve seyyidü’l-vâsılîn eş-Şeyh Nasrullah Efendi b. eş-Şeyh Ömer Efendi mahfil-i kazâda takrîr-i kelâm ve ta‘bîr-i ani’l-merâm edip menzil-i mezbûrun muhavvata-i hâriciyyesinden re’y-i hâkim ve ma‘rifet-i mütevellî ile arsa-i merkūme üzerinde kendi malım ile nefsim için müceddeden fevkānî ve tahtânî binâ ve ihdâs eylemişidim hâlâ savb-ı şer‘den üzerine varılıp ihdâs eylediğim binâ keşf ve tahrîr olunmak matlûbumdur dedikde kıbel-i şer‘den mevlânâ Ali Efendi b. Mustafa irsâl olunup ol dahi hâssa mi‘mârlarından üstâd el-Hâc Hasan ve menzil-i mezbûrun kıbel-i şer‘den mansûb hasbî mütevellîsi olan Davud Efendi b. Ahmed ve zeyl-i kitâbda mastûrü’l-esâmî olup ebniye ve sukūf ahvâline kemâl-i mertebe vukūfu olan bî-garaz müslimîn ile üzerine varıp keşf ve mesâha eylediklerinde binâ-i mezbûrda tûlen yirmi bir ve arzen on iki bi hesâb-ı şatrancî iki yüz elli iki zirâ‘ tavanın her zirâ‘ı ellişer akçeden on iki bin altı yüz akçe ve tûlen yirmi altı ve arzen on iki bi hesâb-ı mezbûr üç yüz on iki zirâ‘ sakfın beher zirâ‘ı yetmiş akçeden yirmi bir bin sekiz yüz kırk akçe ve tûlen kırk bir ve irtifâ‘an beş bi hesâb-ı mezbûr iki yüz beş zirâ‘ dolma duvarın her zirâ‘ı ellişer akçeden on bin iki yüz elli akçe ve tûlen on iki arzen on bir bi hesâb-ı mezbûr yüz otuz üç zirâ‘ tahta döşemenin her bir zirâ‘ı ellişer akçeden altı bin altı yüz elli akçe ve dokuz aded kebîr demirli pencerenin her bir adedi altışar yüz akçeden beş bin dört yüz akçe ve sekiz kıt‘a billur camların her kıt‘ası üçer yüz ellişer akçeden iki bin sekiz yüz akçe ve iki dolap iki sâde kapı ile bir musandıra üç bin akçe ve bir merdiven sahanı ve cunbası ile üç bin akçe ve bir şehnişîni iki bin akçe ve tûlen dokuz arzen üç bi hesâb-ı mezbûr yirmi yedi zirâ‘ tahta sofa döşemesinin her zirâ‘ı ellişer akçeden bin üç yüz elli akçe ve tûlen sekiz arzen sekiz bi hesâb-ı mezbûr altmış dört zirâ‘ tuğla döşemenin her zirâ‘ı otuz akçeden bin dokuz yüz yirmi akçe ve def‘a tûlen yirmi arzen on iki bi hesâb-ı mezbûr iki yüz kırk zirâ‘ sakfın her zirâ‘ı yetmiş akçeden on altı bin sekiz yüz akçe ve tûlen altmış dokuz ve kadden beş bi hesâb-ı mezbûr üç yüz kırk beş zirâ‘ dolma duvarın altışar akçeden on yedi bin iki yüz elli akçe ve tûlen on sekiz arzen yedi bi hesâb-ı mezbûr yirmi altı zirâ‘ tavanın her zirâ‘ı ellişer akçeden altı bin üç yüz akçe ve dört aded demirli pencerenin her adedi üçer yüz akçeden bin iki yüz akçe ve yedi kıt‘a sırça camların her kıt‘ası iki yüz akçeden bin dört yüz akçe ve tûlen sekiz arzen dört bi hesâb-ı mezbûr otuz iki zirâ‘ abdesthâne içinde vâki‘ kaygan döşemenin her zirâ‘ı yetmiş akçeden iki bin iki yüz kırk akçe ve iki musandıra bin beş yüz akçe ve iki ocak bin akçe ve tûlen yirmi bir ve irtifâ‘an beş bi hesâb-ı mezbûr beş zirâ‘ dolma duvarın her zirâ‘ı ellişer akçeden beş bin iki yüz elli akçe ve sekiz kıt‘a sâde kapının her kıt‘ası ikişer yüz akçeden bin altı yüz akçe ve bir kemer kapı üç yüz akçe ve tûlen otuz iki ve irtifâ‘an beş bi hesâb-ı mezbûr altmış zirâ‘ dolma duvarın her zirâ‘ı ellişer akçeden sekiz bin akçe ve tûlen on dokuz arzen altı bi hesâb-ı mezbûr yüz on beş zirâ‘ kerpiç duvarın her zirâ‘ı otuzar akçeden üç bin dört yüz elli akçe def‘a tûlen ve kadden elli altı zirâ‘ kerpiç duvarın her zirâ‘ı otuzar akçeden bin altı yüz seksen akçe ve iki yüz doksan aded Karadeniz ve kestane tahtasının her adedi on altışar akçeden dört bin altı yüz kırk akçe ve tûlen yirmi iki ve irtifâ‘an altı bi hesâb-ı mezbûr yüz kırk iki zirâ‘ altmış akçeden sekiz bin beş yüz yirmi akçe ve def‘a tûlen on bir ve kadden iki bi hesâb-ı mezbûr yirmi iki zirâ‘ taş duvarın her zirâ‘ı altmış akçeden bin üç yüz yirmi akçe ve on bir aded direğin her adedi üçer yüz akçeden üç bin üç yüz akçe ve dükkânların dolmalarında [82a] tûlen ve irtifâ‘an bi hesâb-ı mezbûr seksen zirâ‘ dolma duvarın her zirâ‘ı ellişer akçeden dokuz bin akçe ve bir kebîr merdiven sahanı ve cunbası ve sakfı ile dört bin akçe ve ahırda olan iki sagīr demirli pencerenin her biri ikişer yüz akçeden dört yüz akçe ve ahırın cevânib-i erba‘asında tûlen ve kadden bi hesâb-ı mezbûr yüz yirmi iki zirâ‘ kerpiç duvarın her zirâ‘ı otuz bir akçeden üç bin altı yüz altmış akçe ve ahır üstünde olan arpa ve otluk anbarının tûlen ve arzen bi hesâb-ı mezbûr altmış zirâ‘ tahta döşemenin her zirâ‘ı ellişer akçeden sekiz bin akçe ve tahliyye-i kâriz iki bin akçe ve nalçacı dükkânının destgâh ocağı ve sofa ve döşemesi iki bin akçe ve ahırda olan beş yemlik bin akçe ve sokak kapısının aralığında oturak tahtaları altı yüz akçe [ve] kapı ağızlığı ve etrâfında olan tahta havlusu sekiz yüz akçe ve sokak kapısı kebîr iki bin akçe ki cem‘an yüz doksan kebîr yirmi akçe olduğunu mi‘mâr-ı mezbûr ve sâir ehl-i vukūf müslimîn bi ecma‘ihim ittifâk ve ittihâd eylediklerinden sonra mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: İftihârü’l-müderrisîni’l-kirâm Avnullah Efendi b. Ömer Efendi, Fahrü’l-müderrisîn Mehmed Efendi b. Mustafa eş-şehîr bi Dedezâde, Umdetü’l-müderrisîn Abdülkādir Çelebi b. Mehmed Efendi, Fahrü’l-eimme Ömer Efendi b. Abdülkādir Efendi, Fahrü’l-hutebâ Abdullah Efendi b. el-merhûm Abdülkādir Efendi, Hasan Efendi b. İbrahim eş-şehîr bi Kâtibzâde, Ebûbekir Efendi b. el-İmâm, Mustafa Halîfe b. Mahmud el-Mu‘allim, Mustafa Çelebi b. Mehmed el-Mu‘îd eş-şehîr, Yakub b. Kurd ve gayruhüm.