Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 390 Hüküm no: 501 Orijinal metin no: [82a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Durmuş Bey b. İshak ve kardeşlerinin miras mülklerini Tanaşi v. Duka’ya sattığı Mahmiye-i Kostantıniyye mahallâtından Kilisemescid mahallesi sâkinlerinden Durmuş Bey b. İshak kendi tarafından asâleten ve li ebeveyn karındaşları Emine ve Ümmühâni taraflarından bey‘-i âti’z-zikre ve kabz-ı semene vekîl olup mezbûretân Emine ve Ümmühâni’yi ma‘rifet-i şer‘iyye ile ârifeyn olan Mehmed b. Muharrem ve Hüseyin b. Mehmed şehâdetleri ile şer‘an vekâleti sâbite oldukdan sonra vekâleten mahfil-i kazâda işbu hâmilü’s-sifr Tanaşi v. Duka nâm zimmî muvâcehesinde ikrâr-ı tâm ve takrîr-i kelâm edip Havâss-ı Aliyye kazâsı müzâfâtından Küçükçekmece nâhiyesine tâbi‘ Ayastefanos nâm karyede ve üç bir tarafdan Rali v. Yorgi mülkü ve iki tarafdan mîrî tarla ve bir tarafdan tarîk-i âm ile mahdûd iki bâb tahtânî beyti ve iki bi’r-i mâyı ve zât-ı eşcâr-ı müsmire muhavvatayı müştemil olup bundan akdem müteveffât olan li ebeveyn kız karındaşımız Fâtıma’dan irs-i şer‘i ile bize intikāl eden mülk-i mevrûsumuzu cümle tevâbi‘ ve levâhıkı ile mezbûr Tanaşi’ye fıddî nakd-i râyic fi’l-vakt dört bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr dört bin beş yüz akçeyi mezbûr Tanaşi yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan menzil-i mezbûr Tanaşi’nin mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Receb Efendi b. Abdi, Yakub b. Kurd, Mustafa b. Ali, Ali Beşe b. ( ), korucu Ali Beşe, Mustafa Beşe b. Abdullah, Mehmed Beşe b. ( ).