Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 232 Hüküm no: 234 Orijinal metin no: [30a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın, Mustafa Çelebi b. Ahmed’den muhâlaa yoluyla boşandığı Mahmiye-i İstanbul’da Karabaş mahallesinde sâkine Fâtıma bt. Abdullah nâm hâtun tarafından husûs-ı âti’l-beyâna vekîl olduğu merkūmenin zâtını ma‘rifet-i şer‘iyye ile ârifân olup mahalle-i mezkûre sükkânından İbrahim Çelebi b. Hasan ve Hüseyin Çelebi b. Hasan nâm kimesneler şehâdetleriyle şer‘an sâbit olan Abdullah Çelebi b. Ramazan el-Müezzin meclis-i şer‘-i hatîrde müvekkile-i mezbûrenin zevci bâ‘isü’l-vesîka Mustafa Çelebi b. Ahmed nâm kimesne mahzarında bi’l-vekâle ikrâr ve takrîr-i kelâm edip müvekkilem merkūme Fâtıma Hâtun zevci mezbûr Mustafa Çelebi zimmetinde mütekarrir ve ma‘kūdun-aleyh olan on bin akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâm dahi kendi üzerine olmak üzre mezbûr Mustafa Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika cemî‘ de‘âvî ve mütâlebâtdan her biri âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledi dedikde vekîl-i mezkûr Abdullah Çelebi’nin bi’l-vekâle cârî ve sâdır olan ikrârı el-mukarru lehü’l-mezkûr bi’l-muvâcehe tasdîk ve bi’l-müşâfehe tahkīk etmeğin mâ vaka‘a bi’t-taleb ketb olundu. Fi’l-yevmi’l-hâmis min Cumâdelâhire li sene seb‘a ve seb‘în ve elf. Şuhûdü’l-hâl: Yusuf Beşe b. Ali, Hasan Efendi b. Mustafa, Ali Beşe b. Abdullah, Hüseyin Beşe b. Abdullah.