Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 395 Hüküm no: 509 Orijinal metin no: [83a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri’nin varislerinden oğlu Yani’nin değirmen hissesini kardeşleri Yorgi ve Nikola’ya sattığı Vilâyet-i Rumeli’nde Bogovina kazâsına tâbi‘ Tarsu nâm karye sâkinlerinden iken bundan akdem hâlik olan Dimitri nâm zimmînin verâseti sulbî kebîr oğulları Yani [ve] Yorgi ve Nikola nâm zimmîlere münhasıra olduğu şer‘an müte‘ayyin oldukdan sonra merkūm Yani mahfil-i kazâda işbu hâfızü’l-kitâb karındaşları mezbûrân Yorgi ve Nikola muvâcehelerinde ikrâr ve i‘tirâf edip babamız hâlik-i merkūmun karye-i mezbûrede vâki‘ Harâbyer nâm mevzi‘de manastır kurbunda Enem demekle ma‘rûf değirmenden bi hasebi’l-irsi’ş-şer‘î bana intikāl eden sülüs hisse-i şâyi‘amı, mezbûrân Yorgi ve Nikola’ya bin beş yüz nakd-i fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip onlar dahi ale’l-iştirâki’s-seviy iştirâ ve kabûl eylediklerinden sonra semeni olan meblağ-ı mezbûr bin beş yüz akçeyi yedlerinden bi’t-tamâm ve’l-kemâl ahz ve kabz edip hisse-i mezkûreyi mahallinde zabt [ve] tasarrufa mezbûrân Yorgi ve Nikola’yı taslît eyledim dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Bey b. Abdullah, Yusuf Bey b. Abdullah, Ali Beşe b. ( ) el-Muhzır, Mahmud Çelebi b. ( ) el-Muhzır, Dimo v. Yorgi, Yani v. Kosta, Aleksi v. Niyo, Kosta v. Yani ve gayruhüm.