Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 397 Hüküm no: 513 Orijinal metin no: [83b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mehmed b. Mehmed’in karısı Fâtıma Hatun bt. İlyas Dede’yi 3 yıla kadar geri dönmezse boşanmakta serbest bıraktığı Zümre-i sâdâtdan es-Seyyid Mehmed b. es-Seyyid Mehmed meclis-i şer‘-i şerîf-i lâzımü’t-teşrîfde zevcesi Fâtıma bt. İlyas Dede nâm hâtun tarafından ikrâr-ı âti’z-zikri tasdîka vekîl olup nehc-i şer‘î üzre verâseti sâbite olan kayın atası merkūm İlyas Dede muvâcehesinde bi’t-tav‘ ve’r-rızâ ikrâr ve takrîr-i kelâm edip hâlâ ben sıla-i rahm için vilâyetime gitmeğe müteveccih olup târih-i kitâbdan üç sene tamâmına değin gelip evime dâhil olmazsam zevcem merkūme Fâtıma Hâtun’un irâdeti elinde olup dilerse ben gelince te’hîr ede dilerse nefsini ihtiyâr edip âhara tezvîc ede dedikde mukırr-ı merkūm es-Seyyid Mehmed’in vech-i muharrer üzre cârî olan ikrâr ve takrîrini merkūm İlyas Dede bi’l-vekâle vicâhen tasdîk vicâhen tahkīk edicek mâ hüve’l-vâki‘ hıfzan li’l-makāl ketb [ve] terkīm ve yed-i tâlibine vaz‘ ve teslîm olundu. Fî gurreti Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Sunullah Efendi ( ) eş-Şeyh Mehmed el-Müderris, Abdullah Efendi b. ( ) el-Kadı, Davud Efendi b. Ahmed, Abdülkādir Çelebi b. Mehmed Efendi.