Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 397 Hüküm no: 514 Orijinal metin no: [83b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristodoli v. Andriye’nin Şeyh Mahmud Evkafı’na borcunu ödemesi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Emir Buhârî mahallesi sâkinlerinden eş-Şeyh Mahmud evkāfı’na bi’l-fi‘l mütevellî olan eş-Şeyh Mehmed Efendi b. Pîrî mahfil-i kazâda işbu bâ‘isü’l-kitâb Hristodoli v. Andriye nâm zimmî muvâcehesinde da‘vâ ve takrîr-i kelâm edip mütevellîsi olduğum vakf-ı mezbûr malından mezbûr Hristodoli zimmetinde sekiz bin akçe ve vech-i şer‘î üzre ilzâm olunan ribhden iki bin sekiz yüz otuz akçe ki cem‘an on bin sekiz yüz otuz akçe vardır, suâl olunup alıverilmesin taleb ederim dedikde gıbbe’s-suâl vakf-ı mezbûrun vech-i meşrûh üzre zimmetinde on yedi bin sekiz yüz otuz akçesi vardır deyû ikrâr ve i‘tirâf eylemeğin mûcebiyle edâya tenbîh birle mâ hüve’l-vâki‘ gıbbe’t-taleb ketb olundu. Tahrîren fi’l-yevmi’r-râbi‘ aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Murtaza Halîfe b. ( ) el-İmâm, Mustafa Çelebi b. ( ), Taşçızâde Ahmed Çelebi, Ali Beşe b. ( ) el-Muhzır ve gayruhüm.