Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 402 Hüküm no: 522 Orijinal metin no: [84b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Niko’nun mirasçılarının alacak hususunda Kirana bt. Yuvan ile sulh oldukları Vilâyet-i Rumeli’nde Yanya kazâsına tâbi‘ Arduçko nâm karyeden olup Havâss-ı Aliyye kazâsı müzâfâtından Karfa nâm karyede hâlik olan Dimo v. Niko nâm zimmînin verâseti sulbî oğulları Paroş ve Roto ve Atanaş ve Nikola zevcesi Kalo bt. Niko’ya münhasıra olduğu mütehakkik oldukdan sonra mezkûr Paroş kendi cânibinden asâleten ve karındaşları Roto ve Atanaş ve Niko ve mezbûre Kalo taraflarından husûs-ı âti’l-beyânı vekîl olup hasm-ı şer‘î câhid mahzarında vekâleti Yani v. Niko ve Şiro v. Mano şehâdetleri ile sâbite oldukdan sonra vekâleten mahfil-i kazâda karye-i merkūme Karfa’da sâkine Kirana bt. Yuvan nâm zimmiye muvâcehesinde ikrâr ve takrîr-i kelâm edip mezbûre Kirana’dan babamız sıhhatinde sana on bin nakid fıddî akçe îdâ‘ ve teslîm eylemiş idi deyû da‘vâ ve mezbûre Kirana inkâr etmekle beynimizde münâza‘ât-ı kesîre vâkı‘a olmuşidi el-hâletü hâzihî muslihûn tavassutu ile da‘vâ-yı mezbûreden merkūme Kirana benim ile an inkâr bin nakd-i râyic fi’l-vakt fıddî akçe üzerine inşâ-i akd-i sulh ettikde ben dahi sulh-i mezbûru asâleten ve vekâleten kabûl ve bedel-i sulhü yedinden ahz ve kabz edip husûs-ı mesfûra müte‘allik da‘vâdan zimmetinin ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î vicâhen mâ vaka‘a gıbbe’t-taleb ketb olundu. Tahrîren fi’l-yevmi’t-tâsi‘ ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Çavuş b. ( ) el-Mübâşir, Mehmed Çelebi b. Yunus, Bâlâda Receb Efendi b. Abdi, Kiro v. Mano, Yani v. Nikola, Yorgi v. İstani, Nikola [v.] Yani ve gayruhüm.