Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 403 Hüküm no: 525 Orijinal metin no: [84(2)a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Minho v. Kosta’nın İbrahim Paşa Vakfı’na ait değirmendeki hissesini Atanaş v. Yani’ye sattığı Vilâyet-i Rumeli’nde Yanya kazâsına tâbi‘ Erhaste nâm karye zimmîlerinden Minho v. Kosta nâm zimmî mahfil-i kazâda işbu râfi‘ü’l-kitâb Atanaş v. Yani nâm zimmî muvâcehesinde ikrâr ve i‘tirâf edip mahmiye-i Kostantıniyye sûru ebvâbından Yedikule hâricinde vâki‘ merhûm İbrahim Paşa evkāfı’ndan Nikola nâm zimmî ile ale’l-iştirâki’s-seviy mutasarrıf olduğum bir tarafı sâhil-i bahr ve üç tarafı tarîk-i âm ile mahdûd fevkānî bir bâb odayı müştemil iki göz palamut değirmeninde olan nısf hisse-i şâyi‘amın hakk-ı tasarrufunu ma‘rifet-i mütevellî ile on yedi bin nakd-i râyic fi’l-vakt fıddî akçe mukābelesinde mezbûr Atanaş’a tefvîz eyledim ol dahi tefevvuz ve kabûl eyledikden sonra meblağ-ı merkūm bi’t-tamâm yedinden ahz ve kabz eyledim dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Tahrîren fî selhi Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Mehmed Çavuş b. ( ) el-Mübâşir, Mehmed Çelebi b. Bektaş, Mehmed Çelebi b. ( ) Kethüdâ?, Yorgi v. Yani, İstemadi v. Simo, Kiro v. Matik, Yodorlu v. İstemad, Minho v. Yorgo, Paroş v. Dimo.