Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 410 Hüküm no: 535 Orijinal metin no: [85a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Mehmed’in vakıf çiftlik ve tarlalarını Mehmed b. Aydoğmuş’a sattığı Havâss-ı Aliyye kazâsı müzâfâtından Terkos nâhiyesine tâbi‘ Bosna nâm karye sâkinlerinden Ali Bey b. Mehmed mahfil-i kazâda işbu hâmilü’l-kitâb Mehmed b. Aydoğmuş nâm kimesne mahzarında ikrâr ve i‘tirâf edip karye-i mezbûrda vâki‘ bir tarafdan Ahmed Beşe mülkü ve bir tarafdan ba‘zan Ahmed mülkü ve ba‘zan Hasan mülkü ve iki tarafdan tarîk-i âm ile mahdûd iki bâb tahtânî odaları ve bir ahırı ve sofayı ve samanlığı ve ana muttasıl tahmînen üç evlek bağı müştemil çiftlik ta‘bîr olunur merkūm Mehmed ile ale’l-iştirâki’s-seviy mülkümüzde olan menzilden hisse-i şâyi‘amı mezbûr Mehmed’e tarafeynden îcâb ve kabûlü hâvî bey‘-i bâtt-ı sahîh-i şer‘î ile dokuz bin nakd-i râyic fi’l-vakt fıddî akçeye bey‘ ve teslîm edip ol dahi iştirâ ve tesellüm eyledikden sonra semen-i merkūm dokuz bin akçeyi yedinden bi’t-tamâm ve’l-kemâl ahz ve kabz eyledim ve yine merhûm [ve] mağfûrun-nişân Ebü’l-fethSultan Mehmed Hân evkāfı arâzisinden olup kadîmden çiftlik-i mezbûra intimâ ile tahdîd ve ta‘rîfden müstağnî merkūm Mehmed ile mutasarrıf olduğum dört kıt‘a [85b] tarlalardan dahi hissemin hakk-ı tasarrufunu, evkāf-ı mezbûre mütevellîsi ma‘rifetiyle iki bin mezbûrü’n-na‘t akçe ile vasfı beynimizde ma‘lûm otuz keyl buğday mukābelesinde mezbûr Mehmed’e tefvîz edip ol dahi tefevvuz ve kabûl eyledikden sonra bedel-i tefvîz olan meblağ-ı merkūm iki bin akçe ile ve otuz keyl buğdayı dahi yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezbûr merkūm Mehmed’in mülk-i müşterâsı ve mezâri‘-i merkūme dâhil-i taht-ı tasarrufu olmuşdur dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Sinan Efendi b. Abdullah, es-Seyyid İbrahim Çelebi b. es-Seyyid Halil, Derviş Bey b. Abdullah, Murad Beşe b. Abdullah, İsmail Çelebi b. Mustafa, Mahmud b. Ahmed, Receb Efendi b. Abdi, Aslan Beşe b. Abdullah, Hüseyin Beşe b. Abdullah, Mustafa b. Ahmed.