Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 413 Hüküm no: 540 Orijinal metin no: [86a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zerto v. Sogdori’nin bazı mülklerini İstefani v. Kirayan’a sattığı Vilâyet-i Rumeli’nde kasaba-i Yanya’da sâkin Zerto v. Sogdori nâm zimmî mahfil-i kazâda işbu sâhibü’l-kitâb İstefani v. Kirayan nâm zimmî mahzarında ikrâr ve takrîr-i kelâm edip kasaba-i mezbûrede bir tarafı Derviş Musa mülkü ve bir tarafı İstefani mülkü ve bir tarafı tarîk-i âm ile mahdûd bir bâb fevkānî ve bir bâb tahtânî beyti müştemil olan menzilimi ve bir mengeneli şırahâneyi tarafeynden îcâb ve kabûlü hâvî safka-i vâhide ile bey‘-i bâtt-ı sahîh-i şer‘î ile bey‘ on iki bin nakd-i râyic fi’l-vakt fıddî akçeye bey‘-i bâtt-ı sahîh-i şer‘î ile bey‘ edip ol dahi iştirâ eyledikden sonra semen-i mezbûr on iki bin akçeyi tamâmen mezbûr İstefani yedinden ahz ve kabz edip ve menzil-i mezbûrun mahallinde kabzına taslît eyledim dedikde mukırr-ı mezbûru ikrâr-ı meşrûhunda mezbûr İstefani vicâhen bi’t-tasdîk ve şifâhen tahkīk etmeğin mâ hüve’l-vâki‘ gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ min Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Yani v. Dimitri, Raho v. Minho, Yani v. Nikola, Yani v. Yanko.