Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 412 Hüküm no: 539 Orijinal metin no: [85b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Pervane Hatun’un evini Mümine bt. Muharrem ve eşi Murad b. Mustafa’ya sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Süleyman Subaşı mahallesi sâkinlerinden Belkıs bt. Pervâne nâm hâtun meclis-i şer‘-i hatîr-i lâzımü’t-tevkīrde menzil-i âti’z-zikri şirâya ve def‘-i semeni kendi tarafından asîl ve zevcesi Mümine bt. Muharrem tarafından sâbitü’l-vekâle vekîl olan Murad b. Mustafa mahzarında bi tav‘ihâ ikrâr ve takrîr-i kelâm edip mahalle-i mezbûrede vâki‘ bir tarafdan Ahmed Beşe b. Mustafa mülkü ve bir tarafdan Helvacıbaşı Mehmed Çavuş vakfı ve bir tarafdan Çorbacı vakfı ve bir tarafdan tarîk-i hâs ile mahdûd bir bâb tahtânî beyti ve zât-ı eşcâr-ı müsmire ve gayr-ı müsmire muhavvatayı müştemil mülk [86a] menzilimi, cümle tevâbi‘ ve levâhıkı ve kâffe-i menâfi‘i ve levâhıkı ile mezbûrân Murad ve zevcesi Mümine’ye fıddî nakd-i râyic fi’l-vakt altı bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip onlar dahi ale’l-iştirâk iştirâ ve tesellüm eylediklerinden sonra semen-i mezbûr altı bin akçeyi bi’t-tamâm ve’l-kemâl mezbûr Murad yedinden ahz ve kabz eyledim ba‘de’l-yevm zikr olunan menzil mezbûrân Murad ve Mümine’nin mülk-i müşterâsı olmuşdur. Keyfe mâ yeşâ’ ve yahtâr mutasarrıf olsunlar dedikde mukırra-i mezbûre Belkıs’ın minvâl-i muharrer üzre cârî olan ikrârını el-mukarru leh el-merkūm Murad vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’s-sânî min Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Hüseyin Efendi b. Mehmed el-İmâm, el-Hâc Receb b. Hamza, Mehmed b. Abdullah, Mustafa b. Ahmed, Mahmud b. Ahmed, Bayram Halîfe b. ( ) el-Müezzin, Ahmed Beşe b. Mustafa, Murad Beşe b. Abdullah, Mustafa b. Veli, Ali b. Mustafa.