Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 414 Hüküm no: 542 Orijinal metin no: [86a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirana bt. Yani’nin Sultan Bayezid vakıf tarlasını Ali b. Mustafa’ya devretmesi Havâss-ı Aliyye kazâsı müzâfâtından Karfa nâm karye sâkinlerinden Kirana bt. Yani nâm Nasrâniye meclis-i şer‘-i hatîr-i lâzımü’t-tevkīrde işbu hâmilü’l-kitâb Ali Bey b. Mustafa mahzarında bi’t-tav‘i’s-sâf ikrâr ve i‘tirâf edip karye-i mezkûr hudûdu dâhilinde merhûm ve mağfûrun-leh es-Sultan Bayezid Hân evkāfı arâzisinden olup bir tarafdan Sinan b. Haydar tarlası ve bir tarafdan Anastaş tarlası ve bir tarafdan Danyal tarlası ve bir tarafdan Koska tarlası ile mahdûd tahmînen sekiz keyl tohum istî‘âb eder taht-ı tasarrufumda olan bir kıt‘a tarlamın hakk-ı tasarrufunu, vakf-ı mezbûr mütevellîsi ma‘rifetiyle mezbûr Ali Bey’e fıddî nakd-i râyic fi’l-vakt iki bin akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra bedel-i tefvîz olan meblağ-ı mezbûr iki bin akçeyi mezbûr Ali Bey yedinden bi’t-tamâm ve’l-kemâl ahz ve kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ min Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Receb Efendi b. Abdi, Sinan b. Haydar, Yusuf b. Abdullah, Bekir b. Abdullah, Mehmed b. Abdullah, Mustafa b. Ahmed, Mahmud b. Ahmed, Mustafa Beşe b. Mahmud ve gayruhüm.