Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 415 Hüküm no: 543 Orijinal metin no: [86a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın vakıf tarlasını Mehmed Ağa b. Mustafa’ya devrettiği Havâss-ı Aliyye kazâsı müzâfâtından Karfa nâm karye sâkinlerinden Mehmed b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed Ağa b. Mustafa mahzarında bi’t-tav‘i’s-sâf ikrâr ve i‘tirâf edip karye-i merkūme hudûdu dâhilinde vâki‘ merhûm ve mağfûrun-leh es-Sultan Bayezid evkāfı arâzisinden olup bir tarafdan Kırbaş oğlu Kosta tarlası ve bir tarafdan Kosta v. Dimitri tarlası ve bir tarafdan Kostaki tarlası ve bir tarafdan tarîk-i âm ile mahdûd tahmînen sekiz keyl tohum istî‘âb eder taht-ı tasarrufumda olan bir kıt‘a tarlamın hakk-ı tasarrufunu, vakf-ı mezbûr mütevellîsi ma‘rifetiyle mezbûr Mehmed Ağa’ya fıddî nakd-i râyic fi’l-vakt bin beş yüz akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra bedel-i tefvîz [86b] olan meblağ-ı mezbûr beş bin akçeyi mezbûr Mehmed Ağa yedinden bi’t-tamâm ve’l-kemâl ahz ve kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ min Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Es-Sâbikūn.