Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 416 Hüküm no: 545 Orijinal metin no: [86b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ali’nin otluk çayırının kullanım hakkını Mustafa b. Hasan’a verdiği Vilâyet-i Rumeli’nde Ohri sancağında İstarova kazâsına tâbi‘ Selic nâm karye sâkinlerinden on beş yaşında olup cüssesinin bülûğa tahammülü olan Mehmed b. Ali mahfil-i kazâda bülûğuna mu‘terif oldukdan sonra işbu hâmilü’l-kitâb Mustafa b. Hasan mahzarında bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde vâki‘ bir tarafı Sırrı nâm kimesne tarlası ve bir tarafdan ba‘zan mezbûr Mustafa tarlası ve ba‘zan dere ve iki tarafdan Ayaz nâm kimesne tarlası ile mahdûd ve tahmînen üç araba otluk hâsıl olur taht-ı tasarrufumda olan bir kıt‘a çayırın hakk-ı tasarrufunu, sâhib-i arz ma‘rifetiyle mezbûr Mustafa’ya fıddî nakd-i râyic fi’l-vakt üç bin akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra bedel-i tefvîz olan meblağ-ı mezbûr üç bin akçeyi mezbûr Mustafa yedinden bi’t-tamâm ve’l-kemâl ahz ve kabz edip zikr olunan çayırı mahallinde zabt ve tasarrufa mezbûr Mustafa’yı taslît eyledim dedikde gıbbe’t-tasdîki’ş-şer‘î mâ vaka‘a gıbbe’t-taleb ketb olundu. Tahrîren fi’l-yevmi’l-hâmis min Zilhicceti’l-harâm li sene seb‘a ve erba‘în ve elf. Şuhûdü’l-hâl: Es-Seyyid Mehmed Çelebi b. Bayram, Mehmed b. Ahmed, Mahmud b. Ahmed, Mahmud b. Mustafa, Hüseyin b. Mehmed, Mehmed Bey b. Ahmed, Mustafa Ağa b. Mehmed, Sinan b. Ali, Hasan b. Abdullah, Yakub b. Kurd.