Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 416 Hüküm no: 546 Orijinal metin no: [86b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Ağa b. Gazanfer Kethüda’nın evini Ahmed Bey b. Üveys’e sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Çavuş Kasım mahallesinde sâkin olan kıdvetü’l-emâsil ve’l-akrân Osman Ağa b. Gazanfer Kethüdâ nâm kimesne meclis-i şer‘-i şerîf ve mahfil-i münîfde -sânehallâhu te‘âlâ ani’t-tağyîr ve’t-tahrîf- hâzır olup âtiyyü’z-zikr menzilini hâmil-i hâze’l-kitâb fahrü’l-emâcid ve’l-ekârim Ahmed Bey b. Üveys’e bey‘-i bâtt-ı sahîh ile bey‘ ettiğini ikrâr ve i‘tirâf etti. Müşterî-i mezbûr da mezbûr Osman Ağa’nın işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i mezbûrede vâki‘, bir tarafdan Hüseyin Efendi b. ( ) mülkü, diğer tarafdan ( ) Hanım mülkü, öteki tarafdan kısmen Râziye Hâtun mülkü ve kısmen Mehmed Çelebi mülkü, diğer tarafdan da tarîk-i âm ile mahdûd bulunan ve dâhilî ve hâricî havlulu, dâhilî havluda fevkānî iki beyti, ahırı ve helâyı müştemil olan cemî‘-i menzili cümle tevâbi‘ ve levâhıkı ve kâffe-i menâfi‘ ve merâfıkı ile bilâd-ı İslâmiye’de izn-i sultânî ile tedâvülde bulunan ve riyâlî guruş ta‘bîr edilen râyicü’l-vakt beş yüz kıt‘a sikke-i harbiyye ile iştirâ etti. Îcâb kabûl ve teslîm tesellümle bey‘-i bâtt-ı sahîh tamâm oldu. Müşterî-i mezbûr vâki‘ ikrârı vicâhen ve şifâhen tasdîk etti. Cerâ zâlike ve hurrire fi’l-yevmi’s-sâlis min Zilhicce eş-şerîfe sene seb‘a ve erba‘în ve elf. Şuhûdü’l-hâl: Seyyid Hüseyin Efendi b. Mehmed, Şeyh Mehmed Efendi b. Bekrî, müezzin Murtaza Halîfe b. Mehmed, Oruc b. Şaban, müezzin Mustafa Çelebi b. Ömer, Mustafa Çelebi b. İlyas, Mahmud Çelebi b. Kadri, Mahmud Ağa b. Abdülkādir, Mustafa b. Receb, Ahmed Bey b. Sinan, Hasan b. Mehmed, Lütfi b. Şaban, Ali Çelebi b. Ahmed