Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 422 Hüküm no: 555 Orijinal metin no: [88a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf evin kullanım hakkının Merkez Efendi Zaviyesi şeyhine ait olduğu Havâss-ı Aliyye kazâsında beytülmâl emîni olan Mustafa Bey b. İsa mahfil-i şer‘de, mahmiye-i Kostantıniyye hısnı ebvâbından Yenikapı hâricinde Merkez Efendi zâviyesi’nde şeyh olup menzil-i âti’z-zikre vâzı‘ü’l-yed olduğu şer‘an sâbit olan Ali Efendi b. Nasuh mahzarında üzerine da‘vâ edip zâviye-i mezbûre kurbunda vâki‘ bir tarafdan şeyhülislâm [ve] müfti’l-enâm Yahya Efendi hazretleri mülkü ve bir tarafdan Şeyh İbrahim vakfı ve bir tarafdan Pîrli Beşe mülkü ve bir tarafdan tarîk-i âm ile mahdûd iki bâb tahtânî ve bi’r-i mâyı ve muhavvata-i zât-ı eşcâr-ı müsmire ve gayr-ı müsmireyi müştemil olan menzil bundan akdem müteveffâ olan Receb Bey b. Abdullah nâm kimesneden zevcesi Âlim[e] bt. Abdullah nâm hâtunun hissesine isâbet edip ba‘dehû mezbûre Âlim[e] dahi bilâ-vâris müteveffât olup, sâlifü’z-zikr menzil beytülmâle âid iken mezbûr Şeyh Ali bi gayr-ı vech-i şer‘î vaz‘ edip suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Şeyh Ali cevâbında zikr olunan menzili târih-i kitâbdan yirmi beş sene mukaddem müteveffâ-yı mezbûr Receb Bey hâl-i hayâtında ve kemâl-i sıhhatinde vakf ve tevliyyet gallesini evvelâ kendi nefsine ba‘dehû zevcesi müteveffât mezbûre Âlim[e] Hâtun’a, ba‘dehû kendi azâtlısı Topal Mustafa b. Abdullah nâm kimesneye, ba‘dehû Merkez Efendi zâviyesi’nde şeyh olanlara şart edip ve tescîl-i şer‘î dahi ettirip vakfiyesi tahrîr olunmuşidi lâkin vakfiye-i mezbûre zâyi‘ olmuşdur. Mezbûrân Âlim[e] ve Mustafa fevt olup hakk-ı tasarrufu benim olmağla, meşrûtiyyet üzre hâlâ ber mûceb-i şart-ı vâkıf tasarruf ederim dedikde gıbbe’s-suâl emîn-i mezbûr inkâr ile cevâb verdikde, mezbûr Şeyh Ali’den [88b] müdde‘âsını mübeyyine beyyine taleb olundukda, udûl-i müslimîn ve sikāt-ı muvahhidînden Mehmed Dede b. Emrullah ve Mustafa b. İskender ve İbrahim b. Abdullah ve Hüseyin b. Mahmud nâm kimesneler li ecli’ş-şehâde meclis-i şer‘a hâzırûn olup istişhâd olunduklarında, fi’l-vâki‘ müteveffâ-yı mezbûr Receb Bey târih-i kitâbdan yirmi beş sene mukaddem hâl-i hayâtında zikr olunan menzili bizim huzûrumuzda vakf ve tevliyyet gallesini evvelâ kedi nefsine, ba‘dehû zevcesi mezbûre Âlim[e] Hâtun’a, ba‘dehâ kendi azâtlısı Topal Mustafa’ya, ba‘dehû Merkez Efendi zâviyesi’nde şeyh olanlara şart edip ve tescîl-i şer‘î dahi ettirmiş idi hâlâ bi şart-ı vâkıf mûcebince zikr olunan menzilin hakk-ı tasarrufu mezbûr Şeyh Ali Efendi’nindir. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâki‘ olup mûcebince hükm birle mâ vaka‘a bi’t-taleb ketb olundu. Tahrîren fi’l-yevmi’s-sânî min Zilhicceti’l-harâm li sene seb‘a ve erba‘în ve elf. Şuhûdü’l-hâl: Muslihiddin Halîfe b. Ahmed el-İmâm, Ahmed Halîfe b. eş-Şeyh Muslihiddin, Receb b. Derviş Ali, Mehmed b. Mahmud, Ali Halîfe b. ( ) el-İmâm, Mehmed b. Yusuf, Hasan b. Mehmed, Hasan Sofu b. Ali.