Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 423 Hüküm no: 556 Orijinal metin no: [88b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristodolo v. Andriko’nun Şeyh Mahmud Efendi Vakfı’na borcunu ödediği Merhûm ve mağfûrun-leh Şeyh Mahmud Efendi vakfı’na bi’l-fi‘l câbî ve kāimmakām-ı mütevellî olan Mustafa b. Hamza nâm kimesne mahfil-i kazâda Havâss-ı Aliyye kazâsı müzâfâtından Avasya nâm karye sâkinlerinden işbu hâ[mi]lü’s-sifr Hristodolo v. Andriko nâm zimmî muvâcehesinde bi’t-tav‘i’s-sâf ikrâr ve i‘tirâf edip mezbûr Hristodolo zimmetinde vakf-ı mezbûr malından sekiz bin akçe ve ribhinden dahi iki bin sekiz yüz otuz akçe ki cem‘an on bin sekiz yüz otuz akçe olup meblağ-ı mezbûr mukābelesinde karye-i mezbûrede vâki‘ bir tarafdan Argiri v. Dimitri bağı ve bir tarafdan Togodoş mülkü ve iki tarafdan tarîk-i âm ile mahdûd olan mülk menzilini rehin vaz‘ etmiş idi hâlâ meblağ-ı mezbûr on bin sekiz yüz otuz akçeyi bi’t-tamâm ve’l-kemâl mezbûr Hristodolo yedinden ahz ve kabz edip fekk-i rehin eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâdis min Zilhicceti’l-harâm li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mehmed Efendi b. Ali, Mustafa b. Ahmed, Ahmed b. Mehmed, Mustafa Beşe b. Mahmud Çukadâr, Mustafa b. Mehmed.