Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 424 Hüküm no: 558 Orijinal metin no: [88b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristodolo v. Andriye’nin ev ve bağını Togodoş v. Dimo’ya sattığı Havâss-ı Aliyye kazâsı müzâfâtından Avasya nâm karye sâkinlerinden Hristodolo v. Andriye nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Togodoş v. Dimo nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Argiri v. Dimitri mülkü ve bir tarafdan mezbûr Togodoş mülkü ve bir tarafdan vâdi ve bir tarafdan tarîk-i âm ile mahdûd iki bâb fevkānî beyti ve iki ahırı ve bi’r-i mâyı ve muhavvata-i zât-ı eşcâr-ı müsmire ve gayr-ı müsmireyi müştemil mülkü menzilimi, cümle tevâbi‘ ve levâhıkı ile ve yine karye-i mezkûre kurbunda vâki‘ bir tarafdan Hristo v. Kosta bağı ve bir tarafdan Dimo v. Nikola bağı ve bir tarafdan Vasilaki v. Yorga bağı ve bir tarafdan Kurd v. Yanaki bağı ile mahdûd on çapalık bir kıt‘a mülk bağımı mezbûr Togodoş’a fıddî nakd-i râyic fi’l-vakt otuz üç bin akçeye tarafeynden îcâb ve kabûl hâvî bey‘-i bâtt-ı sahîh-i şer‘î ve safka-i vâhide ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr otuz üç bin akçeyi mezbûr Togodoş yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan menzil ve bağ-ı mezbûr Togodoş’un mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde mukırr-ı mezbûr Hristodolo’nun minvâl-i muharrer üzre cârî olan ikrârını el-mukarru lehü[’l-]merkūm Togodoş vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min Zilhicceti’l-harâm li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mustafa b. Ahmed, Ali b. Mustafa, Yakub b. Kurd, Dimo v. Kula, İstati v. Yani, Yani v. Kozma, Nikola v. Yorgi, Papa Ustoli, Papa Aleksi, Duka v. Yani.