Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 425 Hüküm no: 559 Orijinal metin no: [89a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hatun bt. Kalender’in çiftlik, bağ, fırın ve bostan yerlerini eşi Yusuf Ağa b. Ali’ye sattığı Dârü’l-hilâfeti’l-aliyye Kostantıniyyetü’l mahmiye mahallâtından Emin Bey mahallesinde sâkine fahrü’l-muhadderât Âişe Hâtun bt. Kalender tarafından husûs-ı âti’z-zikri ikrâra vekîl olup hasm-ı câhid mahzarında mezbûreyi ma‘rifet-i şer‘iyye ile ârifeyn olan Mehmed b. Hasan ve diğer Mehmed b. Ahmed şehâdetleri ile şer‘an vekâleti sâbite olan Hüseyin Bey b. Abdullah nâm kimesne mahfil-i kazâda işbu râfi‘ü’l-kitâb mezbûre Âişe Hâtun’un zevci Yusuf Ağa b. Ali mahzarında bi’l-vekâle ikrâr-ı tâm ve takrîr-i kelâm edip müvekkil-i mezbûre Havâss-ı Aliyye kazâsı müzâfâtından Cebeciköyü demekle ma‘rûfe olan karyede vâki‘, bir tarafdan Mezid b. ( ) mülkü ve bir tarafı tarîk-i âm ve iki tarafı vâdi ile mahdûd bir bâb süflî ve bir bâb ulvî beyti ve iki sofayı ve eşcâr-ı müsmire ve gayr-ı müsmireyi hâvî hadîkayı müştemil çiftlik ta‘bîr olunur mülk menzilini, cümle tevâbi‘ ve levâhıkı ile ve çiftlik-i mezbûrda mevcûd olan bir çift su sığırı ve üç çift kara sığır öküzlerini ve yine iki re’s su sığırı tosununu ve iki re’s su sığırı buzağısını ve iki re’s su sığırı ve dört re’s kara sığır ineklerini ve otuz aded tavuk ve yirmi aded ördekleri ve iki arabayı ve beynimizde ilm-i şer‘î ile ma‘lûm olan âlât-ı zirâ‘at ve esbâb-ı hırâseti mezbûr Yusuf Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile on bin nakd-i râyic fi’l-vakt fıddî akçeye bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr on bin akçeyi mezbûr Yusuf Ağa yedinden bi’t-tamâm ve’l-kemâl ahz ve kabz eyledi merhûm ve mağfûrun-leh Sultan Bayezid-i Veli -tâbe serâhû- evkāfı arâzisinden olup kadîmden çiftlik-i mezbûr ile tasarruf olunur müvekkile-i mezbûre tapu ile mutasarrıfe olduğu bir tarafı merhûm Sinan Paşa veresesi mülkü ve bir tarafı bayır ve tarafeyni tarîk-i âm ile mahdûd bir kıt‘a çayır ve etrâf-ı selâsesi bayır ve tarîk-i âm ile mahdûd bir kıt‘a çayır ve bir cânibi bayır ve bir cânibi pınar ve bir cânibi matbah emîni mülkü ile mahdûd bir kıt‘a çayır ve etrâf-ı erba‘ası Andriye ve Manol ve Mezayid nâm zimmîler mülkü ve tarîk-i âm ile mahdûd bir kıt‘a bağ yerini ve ma‘lûmü’l-hudûd bir harman yerini ve bir bostan yerini ve ma‘lûmü’l-hudûd korusunu ve yine ma‘lûmü’l-hudûd olup mevâzi‘-i müteferrikada vâki‘ ( ) tarlasının hakk-ı tasarrufunu evkāf-ı mezbûre mütevellîsi ma‘rifetiyle yine mezbûr Yusuf Ağa’ya tefvîz edip ol dahi tefevvuz ve kabûl eyledi ba‘de’l-yevm menzil-i mezbûr mülk-i müşterâsı ve mezâri‘-i merkūme ve çayırlar dâhil-i taht-ı tasarrufu olmuşdur dedikde vekîl-i mezbûrun vech-i muharrer üzre cârî olan ikrâr ve takrîrini el-mukarru lehü’l-merkūm Yusuf Ağa vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâlis aşer min Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Fahrü’l-müderrisîn Ahmed Efendi b. Mahmud, Ali Efendi b. İsmail el-İmâm, es-Seyyid Hüseyin Çelebi b. es-Seyyid Nuh, Receb Efendi b. Abdi, Hüseyin b. Hasan, Mustafa b. Receb, Yakub b. Kurd, Hasan b. Hüseyin, Mehmed b. Ali, Mahmud b. Ahmed.