Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 429 Hüküm no: 566 Orijinal metin no: [89(2)a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani’nin borçlarına karşılık varislerinin evini sattığı Havâss-ı Aliyye müzâfâtından Çekmece-i Kübrâ nâhiyesine tâbi‘ Kalyoz nâm karyede sâkin iken bundan akdem mürd olan Yani v. ( ) nâm zimmînin verâseti zevce-i metrûkesi Misine bt. Dimitri ve sulbî sagīr oğlu Yorgo’ya ve on üç yaşında olup cüssesinin bülûğa tahammülü oldukdan sonra bülûğuna meclis-i şer‘de mu‘terif olan âhar oğlu Kostantin ve sulbiye-i kebîr kızları Argiri ve Yerakiri’ye münhasıra olduğu şer‘an mütehakkik oldukdan sonra merkūmun Kostantin ve Argiri ve Yerakiri’yi asâleten ve mezbûre ve Misine kendi cânibinden asâleten ve sadrî oğlu sagīr-i merkūm Yorgo’nun tesviye-i umûruna kıbel-i şer‘den mansûbe vasî olmağın vesâyeten mahfil-i kazâda işbu hâmilü’l-kitâb Ömer Bey b. Hızır mahzarında her biri ikrâr ve takrîr-i kelâm edip mûrisimiz hâlik-i merkūm zimmetinde edâsı lâzım olan düyûn-ı müsbetesini edâya menkūlâtı olmayıp akārâtı bey‘ olunmak lâzım gelmeğin, muhallefâtından karye-i merkūmede vâki‘ bir tarafı Hasan Paşa çiftliği ve bir tarafdan Minho mülkü ve bir tarafdan Çakari mülkü ve bir tarafı tarîk-i âm ile mahdûd iki bâb tahtânî beyti müştemil menzili ma‘rifet-i şer‘iyye ile sûk-ı sultânî’de mecâmi‘-i nâs olan yerde mirâren ve kirâren nidâ ve müzâyede olundukda, on üç bin nakd-i râyic fi’l-vakt fıddî akçede merkūm Ömer Bey üzerinde karâr edip ziyâde ile tâlib-i âhar zuhûr etmeyip rağabât-ı nâs münkatı‘a oldukdan sonra menzil-i mezbûru semen-i misli olan meblağ-ı merkūm on üç bin akçeye hâlik-i mezbûrun zarûret-i deyni için tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semen-i mezbûr on üç bin akçe merkūm Ömer Bey yedinden bi’t-tamâm ve’l-kemâl ahz ve kabz eyledik dediklerinde mukırrûn-ı mezbûrûnu cemî‘ kelimât-ı meşrûhalarında mezbûr Ömer Bey vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Tahrîren fî evâhiri Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Receb Efendi b. Abdi, Ali Çelebi b. Mustafa, Abdülkādir Çelebi b. Mehmed, Mustafa Efendi, Yakub b. Kurd ve gayruhüm.