Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 430 Hüküm no: 568 Orijinal metin no: [89(2)a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kulu Beşe b. Mehmed’in evini Osman Ağa b. Gazanfer Ağa’ya sattığı Medîne-i Ebî Eyyûb el-Ensârî mahallâtından Veli Baba mahallesi sâkinlerinden Kulu Beşe b. Mehmed mahfil-i kazâda kıdvetü’l-emâsil ve’l-akrân Osman Ağa b. Gazanfer Ağa muvâcehesinde ikrâr-ı tâm ve takrîr-i kelâm edip mahalle-i mezbûrede vâki‘ bir tarafı Yusuf Bâli mülkü ve bir tarafı bî-zebân Sipâhi mülkü ve bir tarafı mezbûr Osman Ağa mülkü ve bir tarafı tarîk-i âm ile mahdûd iki çatma beyti ve mezbûr Osman Ağa ile müşterek bir su kuyusunu müştemil mülk menzilimi, cümle tevâbi‘ ve levâhıkı ile mezbûr Osman Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile sekiz bin beş yüz nakd-i râyic fi’l-vakt fıddî akçeye bey‘ [89(2)b] ve teslîm edip ol dahi iştirâ ve tesellüm eyledikden sonra semen-i mezbûr sekiz bin akçeyi mezbûr Osman Ağa yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezbûr merkūm Osman Ağa’nın mülk-i müşterâsıdır. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î vicâhen ve şifâhen mâ vaka‘a bi’t-taleb ketb olundu. Tahrîren fi’l-yevmi’s-sâdis min şehri Zilhicce li sene seb‘a ve erba‘în ve elf. Şuhûdü’l-hâl: Mahmud Efendi b. Mehmed, Mustafa b. Şaban, Mehmed Çelebi b. Hüseyin, Şeyhî Çelebi b. Mehmed, Kadri Çelebi b. Mehmed, Mustafa b. İlyas, Mehmed Çelebi b. Şeyhî, Eyüb Çelebi b. Kadri, Hüseyin Çelebi b. Veli ve gayruhüm.