Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 449 Hüküm no: 597 Orijinal metin no: [95a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’nın evini Osman Ağa b. Gazanfer’e sattığı Medîne-i hazret-i Ebî Eyyûb el-Ensârî mahallâtından Veli Baba mahallesi sâkinlerinden Âişe bt. Mustafa nâm hâtun tarafından bey‘-i âti’z-zikri ikrâra ve kabz-ı semene vekîl olup hasm-ı şer‘î-i câhid mahzarında mezbûre Âişe’yi ma‘rifet-i şer‘iyye ile ârifân olan Mustafa b. İlyas ve Mahmud b. Ahmed şehâdetleri ile şer‘an vekâleti sâbite olan zevci Mehmed Çelebi b. Mehmed meclis-i şer‘-i hatîr-i lâzımü’t-tevkīrde işbu bâ‘isü’l-kitâb kıdvetü’l-emâsil ve’l-akrân Osman Ağa b. Gazanfer Ağa muvâcehesinde ikrâr ve takrîr-i kelâm edip zevcem ve müvekkilem mezbûre Âişe’nin mahalle-i mezbûrede vâki‘ bir tarafı Yusuf Bâli mülkü ve bir tarafı Kulu Beşe b. Mehmed mülkü ve bir tarafı bî-zebân Sipâhi mülkü ve bir tarafı tarîk-i âm ile mahdûd bir bâb tahtânî ve bir bâb fevkānî ahırı ve mezbûr Kulu ile müşterek su kuyusunu ve kenîfi ve hadîka-i zât-ı eşcâr-ı müsmire ve gayr-ı müsmireyi müştemil olan mülk menzilini, cümle tevâbi‘ ve levâhıkı ve kâffe-i menâfi‘ ve merâfıkı ile mezbûr Osman Ağa’ya nakd-i râyic fi’l-vakt yirmi bir bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î bey‘ ve teslîm, ol dahi iştirâ ve tesellüm eyledikden sonra semen-i mezbûr yirmi bin akçeyi vekâlet-i mahkiyem hasebiyle mezbûr Osman Ağa yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezbûr mezkûr Osman Ağa’nın mülk-i müşterâsıdır. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î vicâhen mâ vaka‘a gıbbe’t-taleb ketb olundu. Tahrîren fi’l-yevmi’s-sâdis min Zilhicceti’l-harâm li sene seb‘a ve erba‘în ve elf. Şuhûdü’l-hâl: Mahmud Efendi b. Mehmed el-İmâm, Mustafa Çelebi b. Şaban, Mehmed Çelebi b. Halil, Şeyhî Çelebi b. Mehmed, Kadri Çelebi b. Mehmed, Mehmed Çelebi b. Şeyhî, Eyüb Çelebi b. Kadri, Ömer Halîfe b. Musa, Ahmed Dede b. es-Seyyid Ali, Hüseyin Çelebi b. İsa, Yakub b. Kurd.