Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 67 Hüküm no: 29 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manto v. Mihal’in Dimo v. Andriye’ye satın aldığı koyunların bedelinden borcu olduğu Çoban tâifesinden işbu hâmilü’l-kitâb Dimo v. Andriye nâm zimmî meclis-i şer‘-i hatîr-i lâzımü’t-tevkīrde yine tâife-i mezbûreden Manto v. Mihal nâm zimmîyi ihzâr ve mahzarında üzerine da‘vâ ve takrîr-i kelâm edip târih-i kitâbdan bir sene mukaddem her re’si yüz sekiz buçuk akçeye olmak üzre cem‘an doksan beş re’s koyunu on bin üç yüz akçeye bey‘ ve teslîm ve ol dahi vech-i mübeyyen üzre iştirâ ve kabz ve tesellüm etmişdir, suâl olunup alıverilmesi matlûbumdur dedikde gıbbe’l-istintâk merkūm Manto cevâbında fi’l-hakīka târih-i kitâbdan bir sene mukaddem her re’s yüz sekiz buçuk akçeye olmak üzre cem‘an doksan beş re’s koyunu on bin üç yüz cedîd ve ceyyid râyic fi’l-vakt akçeye merkūm Dimo’dan iştirâ eyledim hâlen meblağ-ı mersûm zimmetimde lâzımü’l-edâ ve vâcibü’l-kazâ deyndir dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb ve imlâ ve tahrîr-i inşâ olundu. Hurrire fi’l-yevmi’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Mustafa Beşe el-Muhtesib, Ali b. Mustafa, Süleyman b. Turgud el-Muhzır, …? Musa b. Mustafa el-Muhzır ve gayruhüm mine’l-huzzâr