Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 67 Hüküm no: 28 Orijinal metin no: [7a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun bt. Abdülkâdir’in Nasuh Dede Vakfı’na olan borcunu ödediği ve vakfa istiğlâlen sattığı evini geriye aldığı Medîne-i Ebâ Eyyûb el-Ensârî -radiye anhu Rabbühü’l-Bârî-’de vâki‘ merhûm Nasuh Dede vakfı’na bi’l-fi‘l mütevellî olan Mehmed Çelebi b. Mahmud nâm kimesne meclis-i şer‘-i hatîr-i lâzımü’t-tevkīrde yine medîne-i mezbûrede Bıçakçı Ferhad mahallesinde sâkine işbu râfi‘atü’l-kitâb Emine Hâtun bt. Abdülkādir mahzarında ikrâr ve takrîr-i kelâm edip bundan akdem bin kırk sekiz senesi Şevvâli’l-mükerreminin on birinci günü mezbûre Emine Hâtun mâl-ı vakf-ı mezbûrdan târih-i mezbûrda vakf-ı merkūma mütevellî olan Mustafa Halîfe b. İlyas yedinden bi-tarîki’l-karz iki bin akçe alıp meblağ-ı mezbûr mukābelesinde mahalle-i mezbûrede vâki‘ inde’l-ahâlî ve’l-cîrân ma‘lûmü’l-hudûd mülk menzilini bi-tarîki’l-istiğlâl mütevellî-i mezbûr Mustafa Halîfe’ye bey‘ ve teslîm ve kabz-ı semen-i mersûm eyledikden sonra meblağ-ı mezbûr iki bin akçeden bin akçesini mütevellî-i mezkûr Mustafa Halîfe’ye edâ ve teslîm edip zimmetinde bin akçe kalmışdı, el-hâletü hâzihî meblağ-ı mezbûr bin akçe kâsid ve züyûf olmağın mezbûre Emine Hâtun yedinden tevliyyetim hasebiyle cânib-i vakf-ı mezbûr için sekiz yüz ceyyid ve cedîd râyic fi’l-vakt fıddî akçeyi ahz u kabz edip merkūme Emine’nin zimmetini ibrâ eyledim, min ba‘d asl-ı mâl-ı vakf-ı mezbûrdan ve murâbahasından zimmetinde bir akçe ve bir habbe bâkī kalmamağın menzil-i mezbûru dahi fekk-i rehin eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb ve imlâ olundu. Tahrîren fi’l-yevmi’t-tâsi‘ aşer min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Ali Beşe b. Mustafa, İbrahim Çelebi b. Mustafa, Mustafa Beşe b. Mehmed, Süleyman b. Turgud el-Muhzır ve gayruhüm mine’l-huzzâr