Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 72 Hüküm no: 37 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Mehmed ile Ümmühâni bt. Ahmed’in birbirleri ile olan alacak davasından sulh oldukları Mahmiye-i Galata kapısı kurbunda Emekyemez mahallesinde sâkine Meryem bt. Mehmed mahfil-i kazâda Ümmühâni bt. Ahmed muvâcehesinde ikrâr-ı tâm ve takrîr-i kelâm edip bundan esbak mezkûre Ümmühâni’ye altı yüz akçe kıymetli bir gömlek ve dört yüz akçe kıymetli beynimizde mikdârı ma‘lûm bir pâre kirpas ve yüz akçe kıymetli bir kırmızı barata ve sekiz yüz nakid akçe ve üç yüz akçe kıymetli bir terlik ve bin iki yüz akçeye iki gömlek ki her biri pâre kirpas ki cem‘an bi-hesâb-ı nakd-i cedîd üç bin dört yüz akçe olup meblağ-ı mezbûru taleb ve da‘vâ eylediğimde ba‘zın ikrâr ve ba‘zın inkâr eylediğinden mâ‘adâ benim dahi senin zimmetinde dokuz yüz akçe hakkım vardır deyû benimle muhâsama eylediğine binâen beynimizde münâza‘ât-ı kesîre vâki‘ olmuşdu el-hâletü hâzihî vesâtat-i muslihîn ile meblağ-ı mezbûr dokuz yüz akçe da‘vâsından fâriğa olup bir tencere ve bir ibrik ve bir hamam tası ve bir sahan ve bin iki yüz cedîd râyic fi’l-vakt akçe üzerine inşâ-i akd-i sulh eyledikde ben dahi vech-i muharrer üzre sulh-ı mezbûru kabûl ve bedel-i sulh olan tencere ve ibrik ve tas ve sahanı ve bin iki yüz mezbûrü’n-na‘t akçeyi yedinden tamâmen ahz u kabz eyledim ve husûs-ı mezbûra müte‘allik cemî‘ de‘âvî ve mütâlebât ve eymân ve muhâsamâtdan her birimiz âharın zimmetini ibrâ-i âmm-ı kātı‘ü’n-nizâ‘ ve râfi‘ü’l-husûmet ve’l-cidâl ile ibrâ ve iskāt eyledik dediklerinde gıbbe’t-tasdîk ve’t-taleb ketb ve sebt olundu. Tahrîren fî evâsıtı Saferi’l-hayr li sene erba‘a ve hamsîn ve elf. Şuhûdü’l-hâl: Veli Efendi b. Abdünnebî, Mustafa Efendi b. ( ) el-…?, Mehmed Çelebi b. İbrahim, Hüseyin Çelebi b. ( ) el-Müezzin ve gayruhüm [mine’l-huzzâr]