Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 73 Hüküm no: 38 Orijinal metin no: [8b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman Çelebi b. Abdürrahim’in Râbia bt. Sefer’i boşayıp mehir borcunun bir kısmını ödediği, kalanının zimmetinde olduğu Medîne-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesinde sâkine Râbia bt. Sefer nâm bikr-i bâliğa tarafından husûs-ı âti’l-beyânı taleb ve da‘vâ ve ahz u kabza vekîl olup vekâleti hasm-ı münkir mahzarında mezkûreyi ma‘rifet-i şer‘iyye ile ârifân Receb Efendi b. Abdi ve Ali Beşe b. Mustafa şehâdetleri ile sâbite olan müvekkile-i mezkûre Râbia’nın babası mezbûr Sefer mahfil-i kazâda Halil Paşazâde Abdülkādir Bey b. Ahmed tarafından kezâlik husûs-ı câi’z-zikre vekîl olup alâ vechi’l-hasm Rıdvan Bey b. Abdullah ve Mehmed Bey b. İbrahim şehâdetleri ile şer‘an vekâleti sâbite olan Abdurrahman Çelebi b. Abdürrahim muvâcehesinde bi’l-vekâle üzerine da‘vâ ve takrîr-i kelâm edip bundan akdem kızım ve müvekkilem mezkûre Râbia’yı müvekkil-i mezbûr Abdülkādir Bey’e on bin cedîd akçe mehr-i müeccel ve altı yüz yetmiş akçe kıymetli bir sîm ayna ve beş yüz otuz akçe kıymetli bir la‘l kıymetli bir la‘l hâtem ve her endâzesi ellişer akçeden altı yüz akçe kıymetli on iki zirâ‘ bir duvaklık al tabı ve yüz akçe kıymetli bir mest ve papuç ve altı bin fıddî râyic fi’l-vakt nakid akçe mehr-i mu‘accel üzerine cem‘an on yedi bin dokuz yüz akçe eder vech-i muharrer üzre bi’l-vekâle tezvîc eyledim, ol dahi vech-i muharrer üzre tezevvüc ve kabûl eyledikden sonra yedinden zikr olunan aynayı ve hâtemi ve beş bin akçeyi vekâletim hasebiyle ahz u kabz eyledim, ba‘dehû kızım mezkûre Râbia’yı mezbûr Abdülkādir Bey kable’d-duhûl talâk-ı bâyin-i vâhid ile tatlîk etmekle nısf-ı mehir lâzım gelmeğin hâlen hakkı olan nısf-ı mehr-i mu‘accel ve müeccelden sekiz bin dokuz yüz elli akçenin altı bin iki yüz akçesini kabz eyledim, meblağ-ı bâkī iki bin yedi yüzünü taleb ederim suâl olunsun dedikde gıbbe’s-suâl vekîl-i mezbûr cevâbında fi’l-hakīka müvekkilimin müvekkile-i mezkûre Râbia’da on yedi bin dokuz yüz akçe mehr-i mu‘accel ve müeccel ile tezevvüc edip hâlen zimmetinde zikr olunan nısf-ı mehirden iki bin yedi yüz akçe hakkı kaldığını tav‘an ikrâr etmeğin mûcebince ba‘de’l-hükm mâ hüve’l-vâki‘ bi’t-taleb ketb olundu. Hurrire fî evâsıtı Saferi’l-hayr li sene erba‘a ve hamsîn ve elf. Şuhûdü’l-hâl: Şerîfezâde Hüseyin Efendi [b.] Mehmed el-İmâm, Ali Beşe b. ( ) er-Râcil, Mustafa b. İlyas, Ali Çavuş b. Abdullah, Hüseyin Beşe b. Eyüb, Mehmed b. Abdullah, Ali Çelebi b. Mustafa, Ali Beşe b. Mustafa, Hüseyin Çelebi b. Ali ve gayruhüm [mine’l-huzzâr]