Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 75 Hüküm no: 41 Orijinal metin no: [9a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb b. Ahmed’in vârisi olmadığından muhallefâtının beytülmâle ait olduğu ve beytülmâl emini Mehmed Ağa b. Abdi’nin el-Hâc Bilâl’deki alacağını tahsil ettiği Mahmiye-i Galata’da bi’l-fi‘l beytülmâl-i âmme ve hâssa emîni olan Mehmed Ağa b. Abdi mahfil-i kazâda işbu râfi‘ü’l-vesîka el-Hâc Bilâl b. el-Hâc Mehmed muvâcehesinde emâneten üzerine da‘vâ ve takrîr-i kelâm kılıp bundan akdem Havâss-ı Aliyye kazâsı müzâfâtından Kağıthâne nâm karyede vefât eden Receb b. Abdullah nâm Hindînin zâhir vâris-i ma‘rûfu olmamağla cemî‘ muhallefâtı cânib-i beytülmâle âid olmağın mezbûr el-Hâc Bilâl müteveffâ-yı mezbûrun muhallefâtından dört bohça Hind esbâbı dört yüz riyâlî guruş ahz u kabz eylemişdir, hâlen emânetim hasebiyle taleb ederim suâl olunsun dedikde gıbbe’s-suâl mezbûr el-Hâc Bilâl cevâbında müteveffâ-yı mezbûrun benim yedimde ancak seksen guruş kıymetli yirmi yedi aded hümâyûn ta‘bîr olunur bogasi ve on kıt‘a riyâlî guruş ahz u kabz eyledim deyû zikr eylediği eşyâ ve nakdi ikrâr mâ‘adâyı inkâr edicek emîn-i mezbûrdan sıdk-ı makālini mübeyyine beyyine taleb olundukda ityân-ı beyyineden izhâr-ı acz ile istihlâf edicek müteveffâ-yı mezbûrun muhallefâtından kendi zikr eylediği eşyâ ve nakidden mâ‘adâ bir şeyi ahz u kabz eylemediğine mezbûr el-Hâc Bilâl’e yemîn teklîf olundukda ol dahi alâ vefki’s-suâl yemîn billâhi’l-aliyyi’l-azîm etmeğin emîn-i mezbûr bî-vech mu‘ârazadan men‘ olundukdan sonra emîn-i mezbûr meclis-i âharda bi’t-tav‘ ikrâr ve i‘tirâf edip mezbûr el-Hâc Bilâl’in ikrâr olan yirmi yedi hümâyûnun kıymeti olan seksen guruş ile nakid on kıt‘a riyâlî guruşu mezbûr el-Hâc Bilâl yedinden tamâmen ahz u kabz eyledim ba‘de[’l-yevm] eşyâ-i mezkûre ve nakd-i mezbûrdan mezbûr el-Hâc Bilâl zimmetinde bir akçe ve bir habbe bâkī kalmadı dedikde mâ hüve’l-vâki‘ bi’t-taleb ketb olundu. Fi’l-yevmi’l-mübârek es-sâlis ve’l-ışrîn min Saferi’l-hayr li sene erba‘a ve hamsîn ve elf. Şuhûdü’l-hâl: Yusuf Beşe b. Mehmed, Ahmed Çelebi b. Mehmed, Şeyh Abdüsselâm şeyh-i Hindiyân, el-Hâc İsmail b. ( ) el-Hindî, el-Hâc İbrahim el-Hindî, Sarrâc Mehmed b. ( ) ve gayruhüm [mine’l-huzzâr]