Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 74 Hüküm no: 40 Orijinal metin no: [9a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan ve Mustafa b. Mehmed’in Ömer Beşe b. Osman tarafından kullanılan tarlaları hakkındaki davalarının on beş seneyi geçtiği için kabul edilmediği Medîne-i Ebâ Eyyûb-i Ensârî’de Otakçılar nâm mahalde berber olan Hasan ve Mustafa b. Mehmed mahfil-i kazâda işbu râfi‘ü’l-vesîka Ömer Beşe b. Osman muvâcehesinde her biri üzerine da‘vâ ve takrîr-i kelâm edip mezbûr Ömer Beşe medîne-i mezbûre kazâsı nevâhîsinden Terkos nâhiyesine tâbi‘ Şeyhî nâm karyede bir tarafı sâhil-i bahr ve bir tarafı mezbûr Ömer Beşe tarlası ve bir tarafı Mahmud Ağa nâm kimesne tarlası ve bir tarafı sekbânlar kâtibi Mehmed Efendi tarlası ile mahdûd on dönüm bir kıt‘a tarlamızı yirmi beş seneden beri fuzûlî zabt ve tasarruf eder suâl olunup kasr-ı yedine tenbîh olunmak matlûbumuzdur dediklerinde gıbbe’s-suâl mezbûr Ömer Beşe cevâbında fi’l-hakīka zikr olunan tarlayı yirmi beş seneden beri taht-ı tasarrufunda olduğunu tav‘an ikrâr ve i‘tirâf edip lâkin on beş sene mürûr eden da‘vânın istimâ‘ından fî zamâninâ kuzât-ı İslâm emr-i şerîf-i cihân-mutâ‘-ı pâdişâhî ile memnû‘lar olmağın mezbûrân Hasan b. Mustafa bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fî evâhiri Saferi’l-hayr li sene erba‘a ve hamsîn ve elf. Şuhûdü’l-hâl: Hasan Çelebi b. Ali, İbrahim Beşe b. Abdullah, Receb Efendi b. Abdi, Ali b. Mustafa ve gayruhüm