Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 79 Hüküm no: 48 Orijinal metin no: [10a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zağraka v. Yani adlı tabibin Toros v. Bedros’un fıtık hastalığını tedavi edeceği Yevmü’s-Sülesâ fî 25 min Saferi’l-hayr li sene erba‘a ve hamsîn ve elf. Rûz-ı Hızır İslâmbol’da Sart? hamamında külhancı olan Toros v. Bedros nâm Ermeni meclis-i şer‘-i kavîm-i vâcibü’t-tekrîmde medîne-i Ebâ Eyyûb-i Ensârî’de sâkin işbu râfi‘ü’l-vesîka Zağraka v. Yani nâm zimmî tabîb muvâcehesinde bi’t-tav‘ ikrâr ve takrîr-i kelâm edip hâlen mübtelâ olduğum maraz-ı fıtığa ba‘zı eczâ-i hâdde-i nâfi‘a ile kat‘ ve iltiyâma ve mu‘âlece ve müdâvâya tabîb-i mezbûr Zağraka’ya tîb-i hâtır ile nefsimi teslîm eyledim ol dahi mu‘âleceye ta‘ahhüd eyledi, eğer hîn-i mu‘âlecede tabîb-i mezbûr zimmînin yedinde hâlik olursam veresemden ve sâire-i efrâd-ı âferîdeden bir ferd tabîb-i mezbûr zimmîden dem ve diyetim taleb edip rencîde eylemeye dedikde mukırr-ı mezbûrun vech-i mübeyyen üzre olan ikrâr-ı meşrûhunu el-mukarru lehü’l-merkūm bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene erba‘a ve hamsîn ve elf. Şuhûdü’l-hâl: Mustafa Çelebi b. Hamza, Mehmed Çelebi b. Mustafa, Hüseyin Çelebi b. Ali, Receb Efendi b. Abdi ve gayruhüm