Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 79 Hüküm no: 47 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ebûbekir b. Abdullah’ın Ebûbekir b. Hamza’yı taş ve âsâ ile vurarak yaraladığı Medîne-i Hazret-i Ebâ Eyyûb-i Ensârî’de Çavuş Kasım mahallesinde sâkin Mustafa Çelebi b. Hamza mahfil-i kazâda takrîr-i kelâm edip târih-i kitâbdan iki gün mukaddem ba‘de’l-asr li ebeveyn karındaşım Ebûbekir nâm kimesneyi gāib ani’l-meclis Ebûbekir b. Abdullah nâm kimesne gelip taşla boynuna ve âsâ ile burnuna urup berelemişdir, taraf-ı şer‘den üzerine varılıp keşf ve tahrîr olunması matlûbumdur dedikde medîne-i mezbûrede hâlen âbık nâibi olan mevlânâ Receb Efendi b. Abdi irsâl olunup ol dahi zeyl-i kitâbda isimleri mastûr olan müslimîn ile madrûb-ı mezbûrun menziline varıp ba‘de’l-keşf ve’l-müşâhede hakīkat-i hâl madrûb-ı mezbûrdan istihbâr olundukda fi’l-hakīka mezbûr Ebûbekir vakt-i mezbûrda gelip taşla boynuma ve âsâ ile burnuma urup bereledi dediğini mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihî ihbâr ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene erba‘a ve hamsîn ve elf. Şuhûdü’l-hâl: Mustafa Halîfe b. İlyas, Mehmed Çelebi b. Halil, Rıdvan b. Abdullah, Mahmud Bey b. Mehmed el-Cündî, Muallim b. Abdullah, İbrahim b. Mehmed