Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 80 Hüküm no: 50 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer Bey b. Murad’dan miras kalan evin hisselerini diğer vârislerin zevcesi Sitti Hâtun bt. Mehmed’e sattıkları ve evin tamamının Sitti Hâtun’un malı olduğu Medîne-i Ebâ Eyyûb-i Ensârî -radiye anhu Rabbühü’l-Bârî-’de Veli Baba mahallesinde sâkin iken bundan akdem vefât eden Sefer Bey b. Murad nâm cündînin verâseti zevce-i metrûkesi Sitti Hâtun bt. Mehmed’e ve hâlası oğlu Mehmed b. Ahmed’e münhasıra olduğu şer‘an mütehakkika oldukdan sonra mezkûre Sitti Hâtun’un li ebeveyn karındaşı ve tarafından husûs-ı âti’l-beyânı ikrâra vekîl olup alâ vechi’l-hasm Mahmud Efendi b. Mehmed el-İmâm ve Seyyid Ahmed Çelebi b. Mustafa şehâdetleri ile şer‘an vekâleti sâbite olan çerağī Hasan Çelebi vekâleten ve mezbûr Mehmed dahi kendi tarafından asâleten mahfil-i kazâda müteveffâ-yı mezbûrun kable vefâtihî müteveffât olan zevcesi Mehtab bt. Abdullah nâm hâtunun sadriye kebîre kızı olan fahrü’l-muhadderât Meryem Hanım bt. Mehmed Paşa’nın zevci ve tarafından ikrâr-ı âti’l-beyânı tasdîke vekîl olup hasm-ı câhid mahzarında mezkûreyi ma‘rifet-i şer‘iyye ile ârifân olan Mahmud Efendi b. Mehmed ve Receb b. Mehmed şehâdetleri ile şer‘an vekâleti sâbite olan fahrü’l-akrân Mehmed Ağa b. Abdurrahman muvâcehesinde evvelâ vekîl-i mezbûr çerağī Hasan Çelebi bi’l-vekâle ikrâr-ı tâm ve takrîr-i kelâm edip mahalle-i mezbûrede vâki‘ iki tarafı merhûm Mahzenî Mahmud vakfı ve bir tarafı peştamalcı Ömer Bey mülkü ve bir tarafı tarîk-i âm ile mahdûd iki bâb tahtânî odayı ve sofayı ve kileri ve kapı üzerinde fevkānî bir bâb odayı ve kenîfi ve müşterek su kuyusunu ve muhavvata-i zât-ı eşcâr-ı müsmire ve gayr-ı müsmireyi müştemil menzili müteveffâ-yı mezbûr Sefer Bey ile zevcesi müteveffât-ı mezkûre Mehtab Hâtun’un ale’l-iştirâki’s-seviy mülkleri olup müşâ‘ ve müşterek mutasarrıfân iken mezkûre Mehtab vefât ettikde verâseti zevci müteveffâ-yı mezbûr Sefer Bey’e ve sadriye kebîre kızı müvekkile-i mezbûre Meryem Hanım’a münhasıra olup ba‘de’t-taksîm müteveffât-ı mezkûrenin menzil-i mezbûrede olan nısf hissesinin rub‘u bi-hasebi’l-irsi’ş-şer‘î zevci müteveffât-ı mezbûr Sefer Bey’e ve selâse erbâ‘ı müvekkile-i mezkûre Meryem Hanım’a intikāl edip menzil-i mezbûr sekiz sehim farz olunduğu takdîrce üç sehmi müvekkile-i mezbûre Meryem Hanım’ın ve beş sehmi müteveffât-ı mezbûr Sefer Bey’in taht-ı tasarrufunda iken müteveffât-ı mezbûr Sefer Bey dahi vefât eyledi hâlen menzil-i mezbûrede olan beş sehimden müvekkilem mezkûre Sitti Hâtun’a isâbet [eden] hisse-i şer‘iyyesini müvekkile-i mezbûre Meryem Hanım’a bin cedîd râyic fi’l-vakt akçeye vekâlet-i mahkiyem hasebiyle bey‘ ve teslîm eyledim, ol dahi iştirâ ve tesellüm ve kabûl eyledikden sonra semen-i mezbûrü’n-na‘t bin akçeyi yedinden tamâmen ahz u kabz eyledim deyû sâniyen mezbûr Mehmed dahi takrîr-i kelâm edip menzil-i mezbûrede olan beş sehimden bi-hasebi’l-irsi’ş-şer‘î bana isâbet eden hisse-i şer‘iyyeyi ben dahi müvekkile-i mezkûre Meryem Hanım’a üç bin ceyyid ve cedîd akçeye bey‘-i bâtt-ı kat‘î ile bey‘ ve teslîm eyledim ol dahi iştirâ ve tesellüm ve kabûl eyledikden sonra semen-i mezbûrü’l-vasf üç bin akçeyi yedinden tamâmen ahz u kabz eyledim, ba‘de’l-yevm zikr olunan menzilin mecmû‘u mezkûre Meryem Hanım’ın bi-tarîki’l-irs ve’ş-şirâ hakk-ı sarîhidir keyfe mâ teşâ’ve haysümâ türîd mutasarrıfe olsun dedikde mukırrânın mezbûrânın vech-i mübeyyen üzre olan ikrâr-ı meşrûhunu vekîl-i mezbûr Mehmed Ağa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ ve’l-ışrîn min Saferi’l-hayr li sene erba‘a ve hamsîn ve elf. Şuhûdü’l-hâl: Mahmud Efendi b. Mehmed el-İmâm, Handan Bey b. Abdullah, Mustafa Çelebi b. ( ) el-Müezzin, Piyâle b. Abdullah el-Haffâf, Receb Efendi b. Abdi, Ali Beşe b. Mustafa, Hüseyin Çelebi b. Ali