Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 82 Hüküm no: 51 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Şaban’ın ölen babasının Ali Reis’de kalan alacağının tahsili için Ramazan b. Dağlı’yı vekil tayin ettiği İşbu Mustafa Çelebi b. Şaban mahfil-i kazâ[da] takrîr-i kelâm ve bast-ı merâm edip bundan akdem vefât eden babam mezbûr Şaban gāib ani’l-meclis Ali Reis b. Abdullah nâm kimesneye Arabşah bt. Abdullah nâm câriye-i memlûkesini altı bin râyic fi’l-vakt akçeye bey‘ ve teslîm edip ol dahi iştirâ ve tesellüm ve kabûl eyledikden sonra semen-i mezbûr altı bin akçe mezbûr Ali Reis’in zimmetinde kalmışdır babam müteveffâ-yı mezbûrun ben hasren vârisi olmağla meblağ-ı mezbûr irs-i şer‘le intikāl etmişdir bana hâlen mezbûr Ali Reis’den meblağ-ı mezbûr altı bin akçeyi taleb ve da‘vâ ve ahz u kabza ve bana îsâle ve lede’l-hükkâm mürâfa‘a ve cidâle ve ahz u kabz mütevakkıf olduğu umûrun cümlesine işbu râfi‘ü’l-vesîka Ramazan b. Dağlı nâm kimesneyi vekîl ve menâbıma nâib nasb ve ta‘yîn eyledim dedikde mezbûr Ramazan dahi vech-i muharrer üzre vekâlet-i mezbûreyi kabûl ve hizmet-i lâzımesini edâya müte‘ahhid oldum dedikde mâ hüve’l-vâki‘ bi’t-taleb ketb olundu. Fî evâhiri Saferi’l-hayr li sene erba‘a ve hamsîn ve elf. Şuhûdü’l-hâl: Receb Efendi b. Abdullah, Ali Beşe b. Mustafa, Hüseyin b. Ali, Bayram b. Mehmed, Musa b. Mehmed ve gayruhüm [mine’l-huzzâr]