Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 244 Hüküm no: 250 Orijinal metin no: [32a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Hüseyin b. Abdullah’ın hac yolculuğunda el-Hâc İbrahim’e verdiğini iddia ettiği borcu ispat edemediği Mahmiye-i İstanbul’da ( ) mahallesinde sâkin el-Hâc Hüseyin b. Abdullah nâm kimesne meclis-i şer‘de el-Hâc İbrahim b. Ramazan nâm kimesne mahzarında ikrâr ve da‘vâ ve takrîr-i kelâm edip mukaddemâ mezbûr Hacı İbrahim ile ma‘an hacc-ı şerîfe gider iken esnâ-i tarîkde mezbûr Hacı İbrahim’e malımdan altmış riyâlî guruş ikrâz ve teslîm ol dahi iktirâz ve kabz ve tesellüm etmişidi hâlâ meblağ-ı mezbûru merkūmdan taleb ederim suâl olunsun dedikde gıbbe’s-suâl ve’l-inkâr müdde‘î-i mezbûr Hacı Hüseyin’den müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ müdde‘î-i mezbûr ile ma‘an hacc-ı şerîfe gider iken esnâ-i tarîkde müdde‘î-i merkūmdan vech-i muharrer üzre altmış riyâlî guruş istikrâz ve kabz etmediğine merkūm Hacı İbrahim’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr Hacı Hüseyin bilâ-beyyine mu‘ârazadan men‘ olunup mâ vaka‘a. Fi’l-yevmi’s-sâbi‘ min Cumâdelâhire li sene [10]77. Şuhûdü’l-hâl: Şükrullah Bey b. Mustafa, Mehmed b. Ramazan, Resul b. Ramazan, Mehmed b. Mustafa.