Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 244 Hüküm no: 252 Orijinal metin no: [32b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirakos v. Markar ile Hasan Beşe b. Receb arasındaki yaralama davasında sulh olduğu Mahmiye-i İstanbul’da bezzâzistân kurbunda Mercan çarşısında vâki‘ Ali Paşa odalarında ve dikici tâifesinden Avanos v. Kirakos nâm zimmî tarafından husûs-ı âti’l-beyânı ikrâra vekîl olup Ahmed b. Ali ve Receb b. Mustafa nâm kimesneler şehâdetleriyle şer‘an vekâleti sâbite olan babası Kirakos v. Markar nâm zimmî meclis-i şer‘-i şerîfde Hasan Beşe b. Receb nâm kimesne mahzarında bi’l-vekâle ikrâr ve takrîr-i kelâm edip müvekkilim mezbûr Avanos târih-i kitâbdan beş gün mukaddem zikr olunan odalar önünde sol tarafında boş böğrüne mezbûr Hasan Beşe bıçak ile darb ve mecrûh edip müvekkilim mezbûr dahi da‘vâ ve ba‘de’l-isbât tavassut-ı muslihîn ile merkūm Hasan Beşe müvekkilim mezbûr Avanos’u yirmi esedî guruş üzerine inşâ-i akd-i sulh edip ol dahi sulh-i mezbûru kabûl ve bedel-i sulh olunan meblağ-ı mezbûr yirmi esedî guruşu mezbûr Hasan Beşe yedinden tamâmen ahz u kabz edip da‘vâ-yı mezbûresinden ve eğer mürd olursa dahi dem ve diyetine müte‘allika da‘vâdan mezbûr Hasan Beşe müvekkilim mezbûr Avanos’un zimmetini merkūm Avanos mezbûr Hasan Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Cumâdelâhire li sene seb‘a ve seb‘în ve elf. Şuhûdü’l-hâl: Halil Beşe b. ( ), Osman Beşe b. Durak, Mehmed Beşe b. İshak, Şükrullah Bey.