Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 104 Hüküm no: 86 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arslan b. Abdullah’ın menzilini Şemsperi Hâtun’a sattığı Hâslar kazâsı müzâfâtından Terkos nâhiyesine tâbi‘ Yakublu nâm karye sâkinlerinden Arslan b. Abdullah meclis-i şer‘-i şerîf-i lâzımü’t-tevkīr ve’t-teşrîfde işbu râfi‘atü’l-kitâb umdetü’l-muhadderât tâcü’l-mestûrât Şemsperi Hâtun bt. Abdullah tarafından ikrâr-ı âti’z-zikr[i] tasdîke vekîl olup vekâleti, mezbûreyi ma‘rifet-i şer‘le ârifân olan Hüseyin Çelebi b. Hasan ve Mustafa b. Halil şehâdetleriyle sâbite olan fahrü’l-emâsil ve’l-akrân Osman Çavuş b. Abdülmennân mahzarında bi’t-tav‘ ve’r-rızâ ikrâr ve i‘tirâf ve takrîr-i kelâm edip karye-i mezbûrede vâki‘ bir tarafdan müşterî-i merkūme mülkü ve bir tarafdan Rıdvan b. Abdullah mülkü ve iki tarafdan tarîk-i âm ile mahdûd olup bir bâb tahtânî beyti ve cüneyneyi müştemil olan mülk menzilimi içinde on kovan arısı ile müvekkile-i merkūme Şemsperi Hâtun’a bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık bi-safkatin vâhidetin ceyyid ve cedîd yedi bin nakd-i râyic fi’l-vakt fıddî akçeye bey‘-i bâtt-ı sahîh-i şer‘î ile bey‘ ve teslîm-i mebî‘-i mahdûd ve kabz-ı semen-i ma‘dûd edip ve ol dahi ber vech-i muharrer ve meşrûh kendi malı ile nefsi için iştirâ ve tesellüm eyledi, ba‘de’l-yevm menzil-i mezbûr mersûme Şemsperi Hâtun’un mülk-i müşterâsı ve hakk-ı sarîhidir keyfe mâ teşâ’ve türîd bilâ-münâza‘un min karîb ev ba‘îd mutasarrıfe olsun dedikde mukırr-ı mezbûrun ber vech-i muharrer sâdır olan ikrârını vekîl-i mezbûr Osman Çavuş bi’l-muvâcehe tasdîk ve bi’l-müşâfehe tahkīk eylemeğin işbu hurûf mâ vaka‘a bi’t-taleb ketb ve terkīm olundu. Tahrîr[en] fi’l-yevmi’s-sânî min şehri Rebî‘ilâhir li sene erba‘a ve hamsîn ve elf. Şuhûdü’l-hâl: İbrahim Ağa b. Abdullah el-Müteferrika, Hüseyin Çelebi b. Hasan, Süleyman Ağa b. Abdullah, Bayram Bey el-Bevvâb, Şaban Hâce el-İmâm, Receb b. Abdullah ve gayruhüm mine’l-huzzâr