Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 104 Hüküm no: 87 Orijinal metin no: [16a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pananorya bt. Şiro’nun mülk bağının Nikola v. Yorgi’ye satıldığı Vilâyet-i Rumeli’nde Yenişehir kazâsı müzâfâtından Kuhistân nâhiyesine tâbi‘ Ayadıranda nâm karye sâkinlerinden Pananorya bt. Şiro nâm zimmîye tarafından bey‘ ve kabz-ı semene vekîl olup mezbûreyi ma‘rifet-i şer‘iyye ile ârifân olan Yorgi v. Nikola ve Panayot v. Yani nâm zimmîler şehâdetleriyle vekâleti sâbite olan sadrî oğlu Mavrodi v. Nikola meclis-i şer‘-i şerîf-i lâzımü’t-tevkīrde işbu hâmilü’l-kitâb Nikola v. Yorgi mahzarında bi’l-vekâle ikrâr ve i‘tirâf ve takrîr-i kelâm edip müvekkile-i mezbûrenin karye-i mezbûre kürûmu ve hudûdu dâhilinde vâki‘ bir tarafdan vekîl-i mezbûr Mavrodi bağı ve bir tarafdan Kereçso v. Dimo bağı ve bir tarafdan Hristo v. İzo bağı ve bir tarafdan müşterî-i mezbûr bağıyla mahdûd olup tahmînen beş çapalık bir kıt‘a mülk bağını vekâlet-i mahkiyem hasebiyle merkūm Nikola’ya cedîd ve ceyyid bin üç yüz nakd-i râyic fi’l-vakt fıddî akçeye bey‘-i bâtt-ı sahîh-i şer‘î ile bi-safkatin vâhidetin bey‘ ve teslîm edip ve ol dahi ber vech-i meşrûh iştirâ ve tesellüm eyledikden sonra semen-i mezbûru bin üç yüz mezbûrü’n-na‘t akçe yedinden ahz u kabz edip mârrü’z-zikr bağı mahallinde kabza merkūm Nikola’yı taslît eyledim ba‘de’l-yevm zikr olunan bağı mersûm Nikola’nın mülk-i müşterâsı ve hakk-ı sahîh-i sarîhidir keyfe mâ yeşâ’ ve yürîd bilâ-nizâ‘ min karîb ev ba‘îd mutasarrıf olsun dedikde mukırr-ı mezbûrun bi’l-vekâle cârî ve sâdır olan ikrârını mezbûr Nikola bi’l-muvâcehe tasdîk ve bi’l-müşâfehe tahkīk eylemeğin mâ hüve’l-vâki‘ gıbbe’t-taleb ketb ve terkīm olundu. Tahrîren fi’l-yevmi’s-sânî min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Koli v. Nikola, Şiro v. Nikola, Yani v. Mavrodi, Yani v. Dani, Yorgi v. Nikola ve gayruhüm mine’l-huzzâr