Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 246 Hüküm no: 255 Orijinal metin no: [32b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine bt. Hasan’ın Mehmed b. Mustafa’dan muhâlaa yoluyla boşandığı İstanbul’da Hürrem Çavuş mahallesinde sâkine Âmine bt. Hasan nâm hâtun zevci işbu bâ‘isü’l-kitâb Mehmed b. Mustafa nâm kimesne mahzarında ikrâr ve takrîr-i kelâm edip zevcim mezbûr Mehmed zimmetinde mütekarrir ve ma‘kūdun-aleyh olan bin iki yüz akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Mehmed ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl ettikden sonra zevciyyete müte‘allika âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min Cumâdelâhire li sene seb‘a ve seb‘în ve elf. Şuhûdü’l-hâl: Mustafa b. Ahmed, İbrahim b. Mehmed, Ahmed Çelebi b. Mehmed, Ahmed Çelebi b. Musa.