Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 131 Hüküm no: 123 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hâtun bt. Turâbî’nin menzilini Mustafa Bey b. Aydın’a sattığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Davud Ağa mahallesinde sâkine Sâliha Hâtun bt. Turâbî meclis-i şer‘-i şerîf-i enver ve mahfil-i dîn-i münîf-i ezherde işbu râfi‘ü’l-kitâb fahrü’l-emâsil ve[’l-]akrân Mustafa Bey b. Aydın el-Cündî mahzarında bi’t-tav[‘i]’s-sâf ikrâr ve i‘tirâf ve takrîr-i kelâm edip akd-i âtî sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Sâime Hâtun mülkü ve bir tarafdan Sefer b. Abdullah mülkü ve bir tarafdan Âişe Hâtun bt. Ali mülkü ve bir tarafdan tarîk-i âma müntehî olup bir bâb fevkānî beyti ve altında odayı ve muhavvatayı ve zât-ı eşcâr-ı müsmire ve gayr-ı müsmire bahçeyi müştemil olan menzil bundan akdem müteveffâ olup verâseti sulbiye sagīre kızı Âişe ile li ebeveyn kız karındaşı diğer Âişe’ye münhasıra olmağın menzil-i mahdûd-ı mezbûr sadriye kızı sagīre-i mezbûre Âişe’nin nısf hisse-i şer‘iyyesi için ta‘yîn ve tahsîs olundukdan sonra kızım sagīre-i mezbûre dahi müteveffât olup verâseti bana münhasıra olmağın menzil-i mahdûd-ı mezbûr irs-i şer‘î ile bana intikāl eylemişdi, el-hâletü hâzihî mülk-i mevrûsum olan menzil-i mezbûru cümle tevâbi‘ ve levâhıkı ve âmme-i hukūk ve merâfıkı ile merkūm Mustafa Bey’e yirmi iki bin cedîd ve ceyyid nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve ol dahi ber vech-i muharrer iştirâ ve tesellüm eyledikden sonra semeni olan yirmi iki bin mezbûrü’n-na‘t akçeyi bi’t-tamâm ve’l-kemâl yedinden ahz u kabz eyledim ba‘de’l-yevm menzil-i mezbûr merkūm Mustafa Bey’in mülk-i müşterâ-yı sahîh ve sarîhidir keyfe mâ yeşâ’ ve yürîd bilâ-nizâ‘ min karîb ev ba‘îd mutasarrıf olsun dedikde mukırra-i mezbûreyi ikrâr-ı muharrer ve meşrûhunda merkūm Mustafa Bey vicâhen tasdîk ve şifâhen tahkīk eylemeğin işbu hurûf mâ vaka‘a bi’t-taleb ketb ve terkīm olundu. Tahrîren fi’l-yevmi’t-tâsi‘ aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Fahrü’l-akrân Mehmed Ağa b. İbrahim el-Mu‘arrif, Mustafa Ağa b. İbrahim el-Mu‘arrif, Ahmed Ağa b. Ali el-Cündî, Mehmed Çelebi b. Muharrem el-Yârî?, Mehmed Efendi b. Muharrem el-İmâm, İbrahim Ağa b. Ali el-Cündî, es-Seyyid Kadri Çelebi b. Mehmed, Halil Çelebi b. Hüdâverdi, Selim Bey b. Veli, Nasuh b. Abdüsselâm, Aydın b. Abdullah el-Cündî, Musa Beşe b. Abdullah, Sefer b. Abdullah, el-Hâc Davud b. Mehmed el-Müezzin