Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 132 Hüküm no: 124 Orijinal metin no: [23b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çelebi b. Abdullah ile zevcesi Fâtıma Hâtun bt. İbrahim’in ortak menzillerinin Hatice Hâtun bt. Hanefi’ye satıldığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Kiremitçi Süleyman mahallesi sâkinlerinden olup kendi tarafından asâleten ve zevcesi Fâtıma Hâtun bt. İbrahim tarafından menzil-i câi’z-zikr bey‘ ve kabz-ı semene vekîl olup merkūme Fâtıma’nın zâtını ma‘rifet-i şer‘iyye ile [24a ] ârifân olan Ahmed b. Haydar ve Dilâver b. Abdullah nâm kimesneler şehâdetleriyle alâ vechi hasmin şer‘î vekâleti sâbite olan Mahmud Çelebi b. Abdullah meclis-i şer‘-i şerîf-i lâzımü’t-tevkīr ve’t-teşrîfde işbu râfi‘atü’l-kitâb fahrü’l-muhadderât zahrü’l-muvakkarât, tâcü’l-mestûrât Hatice Hâtun bt. Hanefi tarafından ikrâr-ı âti’l-beyânı tasdîke vekîl olup Ömer Bey b. Mustafa el-Cündî ve Hüseyin Bey b. Mehmed el-Cündî şehâdetleriyle şer‘an vekâleti sâbite olan fahrü’l-emâsil ve’l-akrân Ahmed Bey b. Ali el-Cündî mahzarında bi’l-asâle ve bi’l-vekâle ikrâr ve takrîr-i kelâm ve bast-ı mukaddemât-ı merâm edip akd-i âtî sudûruna değin müvekkilem mezbûre Fâtıma ile alâ tarîki’l-iştirâki’s-seviy silk-i mülkümüzde münselik ve münharit olup mahalle-i mezbûrede vâki‘ bir tarafdan İbrahim Ağa vakfı ve bir tarafdan Medîne-i Münevvere vakfı ve bir tarafdan meşrûtiyyet üzre Berberzâde Mehmed Efendi mutasarrıf oldu[ğu] vakıf menzil ve bir tarafdan tarîk-i âm ile mahdûd üç bâb fevkānî odaları ve sofayı ve tahta-pûşu ve iki bâb tahtânî odaları ve bi’r-i mâyı ve kenîfi ve cüneyneyi ve muhavvatayı müştemil olan mülk menzilimizi cümle tevâbi‘ ve levâhık ve kâffe-i menâfi‘ ve merâfıkı ile mersûme Hatice Hâtun’a kırk bin cedîd ve ceyyid râyicü’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve ol dahi ber vech-i muharrer iştirâ ve tesellüm eyledikden sonra semeni olan kırk bin mezbûrü’n-na‘t akçeyi yedinden bi’t-tamâm ahz u kabz eyledim ba‘de’l-yevm menzil-i mezbûr mersûme Hatice Hâtun’un mülk-i müşterâ-yı sahîhidir keyfe mâ teşâ’ve türîd bilâ-nizâ‘ min karîb ev ba‘îd mutasarrıfe olsun dedikde mukırr-ı mezbûr Mahmud Çelebi’nin bi’l-asâle ve bi’l-vekâle cârî olan ikrârını mezbûr Ahmed Bey vicâhen tasdîk ve şifâhen tahkīk eylemeğin işbu hurûf bi’t-taleb ketb ve terkīm olundu. Hurrire fi’l-yevmi’s-sâmin aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Fahrü’l-emâsil Hasan Ağa b. Muharrem el-Cündî, ..? Ahmed Ağa b. Mehmed el-Cündî, Receb Bey b. Hasan el-Cündî, Veli Bey b. İskender el-Cündî, Mehmed Çelebi b. Mehmed, el-Hâc Mustafa Ağa b. Abdullah el-Mu‘arrif, el-Hâc Mustafa b. Abdullah, Receb Efendi b. Abdi, Mustafa Bey b. Perviz ve gayruhüm mine’l-huzzâr