Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 135 Hüküm no: 128 Orijinal metin no: [24b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sipâhi Mehmed Bey b. Hasan’dan miras kalan evin borçları ve mecnûne olan kızı Âişe’nin nafaka ihtiyâcı için Hasan Beşe b. Tevekkül’e satıldığı Mahrûse-i İstanbul mahallâtından Hâce Hayreddin mahallesinde sâkin iken bundan akdem fevt olan sipâhi Mehmed Bey b. Hasan nâm müteveffânın verâseti zevce-i metrûkesi Sâliha Hâtun bt. Ahmed’e ve sulbî kebîr oğlu Mustafa Çelebi’ye ve sulbiye kebîre kızları Fâtıma ve Âişe ve Hatice’ye münhasıra olduğu şer‘an mütebeyyin ve mütehakkik oldukdan sonra mezbûr Mustafa Çelebi asâleten ve vâlidesi merkūme Sâliha Hâtun dahi mukaddemâ kızı mezbûre Âişe mecnûne olup kıbel-i şer‘den mansûb vasîsi olmağın vâlidesi mezbûre tarafından dahi vech-i âtî üzre vekîl olup hasm-ı câhid mahzarında sahhâf Derviş b. İbrahim b. Sinan ve müezzin Mustafa Çelebi b. Nasuh şehâdetleriyle şer‘an vekâleti sâbite oldukdan sonra vekâleten merkūme Fâtıma Hâtun tarafından husûs-ı âti’l-beyânı ikrâra vekîl olup kezâlik şâhideyn-i mezkûreyn şehâdetleriyle vekâleti sâbite olan umdetü kuzâtü’l-İslâm zübdetü vülâti’l-enâm İbrahim Efendi b. Sinan Efendi ve mesfûre Hatice tarafından dahi vekîl olup kezâlik şâhideyn-i merkūmeyn şehâdetleriyle şer‘an vekâleti sâbite olan zevci fahrü’l-akrân Ali Beşe b. Bayram er-Râcil meclis-i şer‘-i hatîr-i lâzımü’t-tevkīrde [25a ] mîrî kurşuncu zümresinden işbu râfi‘ü’l-kitâb zahrü’l-eşbâh Hasan Beşe b. Tevekkül mahzarında asâleten ve vekâleten her biri ikrâr-ı tâm ve ta‘bîr-i merâm edip verese-i mezkûrûnun mülk-i mevrûsları olup akd-i âtî sudûruna değin ale’l-iştirâk mutasarrıf oldukları emlâkden medîne-i Ebâ Eyyûb-i Ensârî -radiye anhu Rabbühü’l-Bârî-’de Baba Haydar mahallesinde vâki‘ bir tarafdan Çâşnigirzâde Hüseyin Ağa mülküne ve bir tarafdan suyolcu Hüseyin mülküne ve bir tarafdan merhûm Kurd Beşe veresesi mülküne ve bir tarafdan tarîk-i âma müntehî iki bâb beyt-i süflîyi ve sed üzerinde bir tahtânî oda ve matbahı ve iki sofayı ve iki bi’r-i mâyı ve zât-ı eşcâr-ı müsmire ve gayr-ı müsmireyi hâvî muhavvatayı müştemil kırk sehim i‘tibâr olunur mülk-i mevrûsları olan menzil[in] deyn-i müsbet ve zarûret-i nafaka için bey‘ olunması lâzım ve mühim olmağın sûk-ı sultânîde müzâyede olunup rağabât-ı nâs münkatı‘a oldukdan sonra ziyâde ile tâlib-i âhar dahi olmayıp mezbûr Hasan Beşe üzerinde semeni olan otuz altı bin akçe olmak üzre dört yüz elli riyâlî guruşda karâr edip ben dahi mezbûr Hasan Beşe’ye meblağ-ı mersûm dört yüz elli kıt‘a riyâlî guruşa bey‘-i bâtt-ı sahîh-i şer‘î ile bey‘ ve teslîm ve ol dahi vech-i muharrer üzre iştirâ ve tesellüm ettikden sonra semeni olan meblağ-ı mersûmdan her birimiz hissemize isâbet eden meblağı tamâmen ahz u kabz edip teslîm-i mebî‘ eyledik ba‘de’l-yevm menzil-i mahdûd-ı mezkûr merkūm Hasan Beşe’nin mülk-i müşterâ-yı sarîhidir keyfe mâ yeşâ’ ve yahtâr mutasarrıf olsun dediklerinde mukırrûn-ı mezkûrûnun vech-i mübeyyen üzre asâleten ve vekâleten cârî ve sâdır olan ikrâr ve takrîrlerini el-mukarru lehü’l-mezbûr Hasan Beşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Eş-Şeyh Abdullah Efendi b. İsâ, Osman Çelebi b. Ebûbekir, Ramazan Halîfe b. Hüseyin el-Müezzin, Ahmed Çelebi b. Ali, Mehmed Çelebi b. Ali, Mehmed Çelebi b. Mustafa er-Râcil, Ali b. Mehmed, Mahmud Efendi b. Davud, Ahmed Çelebi b. Mustafa, Hasan Bey b. Abdullah ve gayruhüm mine’l-huzzâr