Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 134 Hüküm no: 127 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aksakasos v. Atanaş’ın, Angeli v. Dimo’ya çömlekçi kârhânesini sattığı, daha sonra pişman olarak satışı iptal ettikleri ve bedelin iâde edildiği Mahmiye-i Kostantıniyye mahallâtından ( ) mahallesinde sâkin bâ‘isü’l-kitâb Angeli v. Dimo nâm zimmî meclis şer‘-i hatîr-i lâzımü’t-tevkīrde mahmiye-i mezbûrede Balat Câmi‘i kurbunda Karabaş mahallesinde sâkin Aksakasos v. Atanaş nâm zimmî tarafından husûs-ı âti’l-beyâna vekîl olup hasm-ı câhid mahzarında Angeli v. Mavrodi ve Yanaki v. İstati şehâdetleriyle şer‘an vekâleti sâbite olan Anastas v. İstefanos muvâcehesinde ikrâr ve takrîr-i kelâm edip medîne-i Ebâ Eyyûb-i Ensârî -radiye anhu Rabbühü’l-Bârî-’de merhûm Defterdâr Mahmud Efendi Câmi‘i kurbunda Çömlekçiler sûkunda vâki‘ bir tarafdan Topal Mustafa kârhânesine ve bir tarafdan Abdülfettah Efendi kârhânesine ve iki tarafdan tarîk-i âma müntehî ve mahdûd bir bâb çömlekçi kârhânesini mukaddemâ müvekkil-i mezbûr Aksakasos târih-i kitâbdan on üç gün mukaddem üç yüz kıt‘a riyâlî guruşa bana bey‘ ve teslîm ve ben dahi iştirâ ve tesellüm ettikden sonra semeni olan meblağ-ı mezbûrdan yüz elli kıt‘a riyâlî guruşunu ahz u kabz edip hâlen müvekkil-i mezbûr kendiden sâdır olan bey‘-i mezbûra nâdim olmağın ben dahi tahfîfen mine’l-azâb beynimizde sâdır ve cârî olan bey‘-i ikāle edip def‘ eylediğim meblağ-ı mezbûr yüz elli kıt‘a riyâlî guruşu yedinden ahz eyleyip husûs-ı mezbûra müte‘allik da‘vâ ve nizâ‘ım yokdur dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini vekîl-i mersûm Anastas bi’l-muvâcehe tasdîk ve bi’l-müşâfehe tahkīk edicek mâ vaka‘a ketb ü tahrîr olundu. Hurrire fi’l-yevmi’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed Serbölük, Ali Beşe b. Mustafa, Hüseyin Çelebi b. Ali, Musa Beşe [b.] Mustafa ve gayruhüm mine’l-huzzâr