Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 136 Hüküm no: 130 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Franko v. İstamo’nun Polo v. İsteryano’ya sattığı iki yüz seksen baş koyunun bedeline tamamen tahsil ettiği Mahmiye-i Kostantıniyye -humiyet ani’l-âfât ve’l-beliyye- hısnı ebvâbından Kumkapısı mahallesinde vâki‘ selhhânede sâkin kasab tâifesinden Franko v. İstamo nâm zimmî meclis-i şer‘-i lâzımü’t-tevkīrde yine tâife-i mezbûreden işbu hâmil-i hâze’l-kitâb Polo v. İsteryano nâm zimmî muvâcehesinde bi-tav‘ihî ikrâr ve takrîr-i kelâm edip târih-i kitâbdan beş sene mukaddem mezbûr Polo’ya her re’si doksanar akçe olmak üzre iki yüz seksen re’s koyun yirmi beş bin iki yüz züyûf akçeye bey‘ ve teslîm ve ol dahi iştirâ ve tesellüm eylemişdi el-hâletü hâzihî meblağ-ı mezbûrun altından kıymet-i şer‘iyyesi olan altı bin cedîd ve ceyyid râyic fi’l-vakt akçeyi merkūm Polo yedinden bi’t-tamâm ve’l-kemâl ahz u kabz edip meblağ-ı mezbûra müte‘allik da‘vâ ve nizâ‘dan zimmetini ibrâ-i âm ile ibrâ ve iskāt-ı tâm ile iskāt eyledim min ba‘d meblağ-ı mersûmdan merkūm Polo zimmetinde bir akçe ve bir habbe hakkım bâkī kalmadı dedikde mukırr-ı mezbûr[un] vech-i mübeyyen üzre cârî ve sâdır olan ikrâr ve takrîrini [25b ] el-mukarru lehü’l-mezbûr Polo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’s-sâlis ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mustafa Beşe el-Muhtesib, Ali Beşe el-Muhzır, Baba Süleyman el-Muhzır, Musa b. Mustafa, Hırasafo v. Yani, Şiro v. İstemad, Yani v. Sakto, Lambo v. Andriye, Aleksi v. Bejobani ve gayruhüm mine’l-huzzâr