Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 137 Hüküm no: 131 Orijinal metin no: [25b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Aleksi’nin tasarrufundaki vakıf tarlayı Hatice Hâtun bt. Mehmed Bey’e devrettiği Kazâ-i Havâss-ı Refî‘a müzâfâtından Terkos nâhiyesine tâbi‘ Arnavutköyü demekle ma‘rûf karyede sâkin Nikola v. Aleksi nâm zimmî meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızası zahrü’l-muvakkarât Hatice Hâtun bt. el-merhûm Mehmed Bey tarafından vech-i âtî üzre tasdîke vekîl olup bimâ hüve nehcü’s-sübût vekâleti sâbite sadrî oğlu oğlu fahrü’l-emâsil ve’l-a‘yân Mehmed Bey b. İbrahim mahzarında ikrâr ve takrîr-i kelâm edip merhûm ve mağfûrun-leh Sultan Bayezid Hân -aleyhi’r-rahmetü ve’l-gufrân- hazretlerinin arâzi-i mevkūfesinden karye-i mezbûre sınırı dâhilinde vâki‘ bir tarafdan Topal Aydın tarlasına ve iki tarafdan Yusuf Ağa tarlasına ve bir tarafdan tarîk-i âma müntehî tahmînen bir müd tohum isti‘âb eder mutasarrıf olduğum bir kıt‘a tarlanın hakk-ı tasarrufunu mütevellî-i vakf-ı mezbûr ma‘rifetiyle müvekkile-i mezbûre Hatice Hâtun’a bin sekiz yüz cedîd ve ceyyid râyic fi’l-vakt akçeye tefvîz ve ol dahi vech-i mübeyyen üzre tefevvuz ve kabûl ettikden sonra mukābele-i tefvîzde olan bin sekiz yüz nakd-i mezbûrü’n-na‘t akçeyi müvekkile-i mezbûre yedinden bi’t-tamâm ve’l-kemâl ahz u kabz eyledim ba‘de’l-yevm mârrü’z-zikr bir kıt‘a tarla müvekkile-i mersûmenindir sâir emsâli tasarrufu gibi mutasarrıfe olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini vekîl-i mezbûr Mehmed Bey bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb ü tahrîr olundu. Hurrire fi’l-yevmi’s-sâlis ve’l-ışrîn min Rebî‘ilâhir li sene erba‘a ve hamsîn ve elf. Şuhûdü’l-hâl: Behmen Kethüdâ b. Abdullah, Ali Halîfe el-İmâm, Ahmed Çelebi b. Mehmed er-Râcil, Hüseyin b. Receb, Ebûbekir b. Hasan, Ali Beşe el-Muhzır ve gayruhüm mine’l-huzzâr