Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 154 Hüküm no: 153 Orijinal metin no: [30a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Yorgi’nin tasarrufundaki tarlayı Panayot v. İstadi’ye devrettiği Vilâyet-i Rumeli’nde Mora sancağında Kartine kazâsına tâbi‘ Solaman nâm karye sâkinlerinden Yani v. Yorgi nâm zimmî meclis-i şer‘-i hatîr-i lâzımü’t-tevkīrde işbu sâhibü’l-kitâb Panayot v. İstadi nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip akd-i âtî sudûruna değin yedimde ve taht-ı tasarrufumda olan tarlalarımdan Soğuksu nâm mevzi‘de bir tarafdan Senadinos v. Dimitri tarlasına ve bir tarafdan Yani v. Dimo tarlasına ve bir tarafdan İstadi v. Yani tarlasına ve bir tarafdan Nikola v. Patek tarlasına müntehî olup tahmînen on beş keyl tohum isti‘âb eder bir kıt‘a tarlamın hakk-ı tasarrufunu sâhib-i arz ma‘rifetiyle mezbûr Panayot’a on beş kıt‘a riyâlî guruşa ferâğ ve tefvîz ve ol dahi ber vech-i muharrer tefevvuz ve kabûl eyledikden sonra mukābele-i tefvîz olan on beş kıt‘a mezbûrü’n-na‘t guruşu yedinden bi’t-tamâm ve’l-kemâl ahz u kabz edip mârrü’z-zikr tarlayı mahallinde tasarrufa mezbûr Panayot’u taslît eyledim ba‘de’l-yevm tarla-yı mahdûd mülk-i müfavvazı ve hakk-ı sahîh ve sarîhidir sâir mutasarrıfları gibi mutasarrıf olsun dedikde mukırr-ı mezbûru ikrâr-ı muharrer ve meşrûhunda el-mukarru lehü’l-mezbûr vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb ü tahrîr olundu. Tahrîren fî selhi şehri Rebî‘ilâhir li sene erba‘a ve hamsîn ve elf. Şuhûdü’l-hâl: Yorgi v. Sofyanos, Nikola v. Yorgi, Yorgi v. Senadinos, Dimo v. İstemad, Panayot v. Verakine, İstirati v. Senadinos, Andresi v. Yorgi ve gayruhüm mine’l-huzzâr