Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 155 Hüküm no: 154 Orijinal metin no: [30a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayram b. Abdullah’ın bağını Monoso v. Petro’ya sattığı Vilâyet-i Rumeli’nde Mora sancağında Mizistre kazâsına tâbi‘ Lonkank nâm karye sâkinlerinden Bayram b. Abdullah nâm kimesne meclis-i şer‘-i hatîr-i lâzımü’t-tevkīrde yine karye-i mezbûrede işbu sâhibü’l-kitâb Monoso v. Petro nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip akd-i âtî sudûruna değin silk-i mülkümde münselik olan karye-i mezbûre kurbunda Belıgrıf? nâm mevzi‘de vâki‘ bir tarafdan Mehmed Beşe b. Abdullah bağına ve bir tarafdan Panayot bağına ve iki tarafdan vâdiye müntehî bir mikdâr arz-ı hâliyeyi hâvî tahmînen beş çapalık bir kıt‘a mülk bağımı cümle tevâbi‘ ve levâhık ve âmme-i menâfi‘ ve merâfıkı ile merkūm Monoso’ya iki bin cedîd ve ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm zikr olunan bir kıt‘a bağı merkūm Monoso’nun mülk-i müşterâ-yı sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Monoso bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā ketb ve terkīm olundu. Hurrire fi’l-yevmi’s-sâmin ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mustafa Beşe b. Ramazan Teberdâr, Hasan Beşe b. Derviş Teberdâr, Hasan b. Ferhad el-Bakkāl, Hüseyin b. Mehmed el-Bakkāl, Mehmed b. Ferhad, Mahmud b. Ali, Mustafa Beşe b. Mehmed, Ali b. Mustafa ve gayruhüm mine’l-huzzâr