Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 159 Hüküm no: 160 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun bt. el-Hâc İbrahim’in Rus asıllı Avika bt. Ahnad adlı câriyesini azat ettiği Medîne-i Ebâ Eyyûb-i Ensârî -rahmetullâhi aleyhi Rabbühü’l-Bârî-’de Câmi‘-i Kebîr mahallesinde sâkine Emine Hâtun bt. el-Hâc İbrahim tarafından ıtk-ı âti’l-beyânı ikrâra vekîl olup hasm-ı câhid-i şer‘î mahzarında mezbûreyi ma‘rifet-i şer‘iyye ile ârifân olan Mehmed Beşe b. Veli ve Mustafa b. Ahmed nâm kimesneler şehâdetleri ile vekâleti sâbite olan müvekkile-i mezbûrenin zevci Süleyman Beşe b. Ali nâm râcil meclis-i şer‘-i hatîr-i lâzımü’t-tevkīrde müvekkile-i mezbûre Emine’ye rıkkıyyetini i‘tirâf eyleyen işbu orta boylu açık kaşlı gök elâ gözlü sarışın müsinne Rûsiyyetü’l-asl sâhibet-i hâze’l-kitâb Avika bt. Ahnad nâm Nasrâniyyeyi hasbeten lillâhi’l-aliyyi’l-azîm ve taleben li merzâti’r-rahîm mülkümden ihrâc ve silk-i harâir-i asliyyâta idrâc edip i‘tâk ve tahrîr eyledi ba‘de’l-yevm sâir harâir-i asliyyât gibi hürre olup üzerinde hakk-ı velâdan gayrı hakkım kalmadı dedi dedikde mukırr-ı mezbûrun bi’l-vekâle ber vech-i mübeyyen cârî ve sâdır olan ikrârını el-mukarru lehü’l-mezbûre Avika bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ alâ vukū‘ihî bi’t-taleb ketb olundu. Tahrîren fî selhi şehri Rebî‘ilâhir li sene erba‘a ve hamsîn ve elf. Şuhûdü’l-hâl: Hüseyin b. Ali, Mustafa b. Mehmed, Ali b. Mustafa, Mustafa b. Veli, İbrahim b. Mustafa, Ahmed Beşe er-Râcil Çukadâr, Süleyman b. Turgud, Bayram Sofu ve gayruhüm mine’l-huzzâr