Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 158 Hüküm no: 159 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâssa doğancılardan Dimitri v. Pendazi ile Palalego v. Manol’ün köy ahâlîsi ile birlikte vergi vermeye râzı oldukları Medîne-i Ebâ [Eyyûb-i] Ensârî müzâfâtından Makrihorya nâm karyede sâkin hâssa doğancılardan Dimitri v. Pendazi ve Palalego v. Manol nâm zimmîler meclis-i şer‘-i şerîf-i lâzımü’t-tevkīrde yine karye-i mezbûreden işbu râfi‘ü’l-kitâb Kosta v. Dimitri ve Yani v. Andriye ve Yani v. Angeli ve Temandi v. Manol ve sâirleri muvâcehelerinde her biri ikrâr ve takrîr-i kelâm edip karye-i mezbûre ahâlîsine teklîf olunan tekâlîf-i şâkka ve sâir umûr-ı sa‘beyi karye-i mezbûre ahâlîsi bizim ile ma‘an çekin deyû dâimâ mücâdele ve mu‘âraza eylediklerinde bizim dahi tekâlîf-i mezbûreden hâssa doğancı olmağla mu‘âflarız deyû edâsına ta‘allül ve nizâ‘dan hâlî olmayıp el-hâletü hâzihî kendimiz rızâmız ile beher sene ikimiz ahâlî-i karye-i mezbûreye beş yüz kırk akçe mu‘âvenet etmek üzre kavl ve ittifâk ve ahd ve mîsâk eyledik dediklerinde gıbbe’t-tasdîki’ş-şer‘î meblağ-ı mezbûr beş yüz kırk akçeden iki yüz kırk akçesini merkūm Dimitri ve üç yüz akçesini mersûm Palalego ahâlî-i karye-i mezbûreye beher sene edâ ve teslîm etmek üzre ta‘ahhüd eylemeğin işbu hurûf hıfzan li’l-makāl ketb ve terkīm olundu. Tahrîren fî selhi şehri Rebî‘ilâhir li sene erba‘a ve hamsîn ve elf. Şuhûdü’l-hâl: Ali Beşe b. Mustafa, Mustafa Beşe b. ( ) el-Muhtesib, İbrahim Çelebi b. Mustafa, Baba Süleyman [b.] Turgud