Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 160 Hüküm no: 162 Orijinal metin no: [31b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Osman’ın menzildeki hissesini Âişe Hâtun bt. Abdullah’a sattığı ve bedeli borcu ile takas ettikleri Medîne-i Hazret-i Ebâ Eyyûb-i Ensârî -aleyhi rahmetü’l-Bârî- mahallâtından Düğmecibaşı mahallesinde sâkin Mehmed b. Osman nâm kimesne meclis-i şer‘-i hatîr-i lâzımü’t-tevkīrde işbu râfi‘atü’l-kitâb Âişe Hâtun bt. Abdullah mahzarında bi’t-tav‘ ve’r-rızâ ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Mustafa Beşe mülkü ve bir tarafdan Şaban mülkü ve bir tarafdan Hasan mülkü ve bir tarafdan tarîk-i âm ile mahdûd bir bâb beyt-i ulvîyi ve bir bâb beyt-i süflîyi ve cüneyneyi ve kenîfi müştemil menzilde olan nısf mülk hisse-i şâyi‘amı mezbûr Âişe Hâtun’a kırk yedi kâmil riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm-i mebî‘-i mahdûd edip ol dahi ber vech-i muharrer iştirâ ve tesellüm ettikde semeni olan kırk yedi riyâlî guruş-ı kebîrden otuz iki guruşunu müşterî-i mezbûreye zimmetimde vâcibü’l-edâ deynim olan on altı altının kıymet-i şer‘iyyesi olan otuz iki mezbûrü’n-na‘t guruşa takās edip meblağ-ı mezbûrdan bâkī on beş guruşunu mezbûre Âişe Hâtun yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezbûrda olan nısf hisse-i şâyi‘am mezbûre Âişe Hâtun’un mülk-i müşterâsıdır müstakillen keyfe mâ teşâ’mutasarrıfa olsun dedikde mukırr-ı mezbûrun ber vech-i mübeyyen cârî ve sâdır olan ikrârını el-mukarru lehü’l-mezbûre Âişe Hâtun bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Tahrîren fî gurreti Cumâdelûlâ li sene erba‘a ve hamsîn ve elf. Şuhûdü’l-hâl: Halil b. Mehmed el-Müezzin, Mustafa Çelebi b. ( ) Kazganîzâde, Halil Çelebi b. Haydar, Hüseyin Çelebi b. Eyüb, Mehmed Çelebi b. İsmail, Mahmud Çelebi b. İsmail, zahrü’l-akrân Rıdvan Ağa b. Abdullah ve gayruhüm